Sviatoslav Ièr
Sviatoslav Ièr (942, Kiev - 972, Khortytsia) es un grand-prince de la Rus' de Kiev que reinèt de 962 a 972. Plaçat sota la regéncia de sa maire Olga de 945 a 962, es formalament lo successor de son paire Igor de Kiev (912-945). Foguèt remplaçat per Iaropolk Ièr (972-980). Son rèine marquèt un periòde de renforçament important de la poissança militara de la Rus' qu'infligiguèt de desfachas ai Cazars, ai Bulgars e ai Pechenegs. Pasmens, sa mòrt entraïnèt un periòde de trèbols intèrnes que durèt uech ans.
Biografia[modificar | Modificar lo còdi]
Jovença e formacion[modificar | Modificar lo còdi]
La jovença de Sviatoslav Ièr es pas descricha dins lei fònts istoricas disponiblas. Sa maire, Olga de Kiev, èra regenta de la Rus' dempuei la mòrt d'Igor de Kiev en 945. Oficialament convertida au cristianisme, aviá reprimit plusors revòutas, estabilizat l'Estat gràcias au renforçament de l'aliança amb l'Empèri Bizantin e luchat còntra leis incursions dei Pechenegs, un pòble nomada originari de l'estèpa. Sviatoslav aguèt un tutor varèg, tradicion que se mantenguèt fins au sègle XI au sen de la dinastia rurikida. Pasmens, es lo premier sobeiran de la Rus' amb un nom eslau, çò que marquèt l'integracion creissenta dei Rurikidas au sen de la populacion locala.
Rèine[modificar | Modificar lo còdi]
Sviatoslav venguèt major en 962 mai laissèt lo poder entre lei mans de sa maire fins a la mòrt d'aquela darriera en 969. Pasmens, prenguèt rapidament lo comandament dei fòrças militaras. Tre 964, comencèt una guèrra còntra lei Cazars, un autre pòble nomada, que li permetèt de conquistar la vau inferior de Vòlga. La causa d'aqueu conflicte es desconeguda. Segon leis ipotèsis principaus, pòu èsser lo resultat d'una volontat de contrarotlar lo comèrci de la region ò d'una demanda d'ajuda militara formulada per Constantinòble. Que que siegue la rason, s'acabèt per una victòria majora de la Rus' que vassalizèt son adversari.
Puei, Sviatoslav intrèt en guèrra còntra lei Bulgars en 967. Un an pus tard, s'entornèt a l'èst per combatre tornarmai lei Cazars. Aqueu còp, destruguèt lor capitala en 968 ò en 969. Dins aquò, deguèt rapidament se dirigir vèrs Kiev qu'èra menaçada per lei Pechenegs. Sei victòrias inquietèron lei Bizantins e una guèrra opausèt la Rus' e l'Empèri en Bulgaria. En 971, Sviatoslav foguèt batut e capturat per l'emperaire Joan Ièr Zimisces (969-976) mai la patz foguèt rapidament restablida car l'aliança Kiev-Constantinòble èra tròp importanta per lei dos Estats.
Pasmens, Zimisces aviá paur d'un traïment futur de Sviatoslav. Permetèt donc ai Pechenegs d'organizar una emboscada per tuar lo prince de Kiev sus una illa de Dnièpre. Lo crani de Sviatoslav foguèt transformat en copa per lo khan dei Pechenegs, Kurya. La mòrt de Sviastolav marquèt lo començament d'un periòde de trèbols intèrnes per la Rus' que durèt fins au rèine de Vladimir lo Grand (980-1015).
Annèxas[modificar | Modificar lo còdi]
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Jean-Pierre Arrignon, Chronique de Nestor, Naissance des mondes russes, Anacharsis, 2008.
- (fr) Jean-Pierre Arrignon, Russie, Presses Universitaires de France, 2008.
- (fr) Michel Heller, Histoire de la Russie et de son Empire, Tempus Perrin, 2015.
- (fr) Arkady Joukovsky, Histoire de l’Ukraine, Dauphin, 2022.