Sètge de Menèrba (1573-1578)
Lo sètge de Menèrba se debanèt dau 4 d'octòbre de 1573 au 9 de decembre de 1578 durant lei guèrras de Religion. Opausèt una garnison protestanta d'aperaquí 150 òmes a una armada catolica que tenguèt fins a 15 000 òmes. S'acabèt per una victòria malaisada mai importanta dei catolics.
D'efèct, en despiech de son inferiotat numerica gròssa, la garnison, sostenguda per d'abitants, poguèt aprofichar la topografia favorabla a la defensa per defugir un assaut dirèct e s'avitalhar regularament gràcias a de contactes ambé de protestants demorats en fòra de la vila. Leis asalhidors aguèron de dificultats per establir un blocus eficaç e deguèron finalament organizar lo bombardament generalizat dei fortificacions. Aquò permetèt de destrurre certaneis obratges periferics e, subretot, de durbir de negociacions lòngas entre lei dos camps. S'acabèron per la rediccion de la plaça en cambi de la libertat dei defensors que se retirèron a Murs.
Maugrat sa dificultat e son còst financier important, aquela victòria catolica entraïnèt l'afondrament dei fòrças protestantas provençalas. La region passèt sota lo contraròtle dei catolics e lo demorèt fins a la fin dei guèrras de Religion.