Sèrgi Gairal
| Sèrgi Gairal | |
| Naissença | 19 de febrièr de 1948, Castras |
|---|---|
| Occupacion | Escrivan |
Sèrgi Gairal, en francés Serge Gayral, nascut a Castras (Tarn) lo 19 de febrièr de 1948 es un escrivan occitan.
Biografia[modificar | Modificar lo còdi]
Sèrgi Gairal nasquèt dins una familha tarnesa umila. Sa maire bailejava l’ostal, son paire èra obrièr dins lo textil. Aguèron tres mainatges, Sèrgi es l’ainat. Passèt tota son enfança a Braçac. Faguèt d’estudis per venir professor d'espanhòl. Una profession que lo menèt a trabalhar dins divèrsas vilas de França (Marselha, Luxueil-les-Bains, Cransac-les-Thermes, Vilafranca-de-Roergue) mas tanben en Espanha (León) coma assistent de francés.
Essent luènh de sas rasigas quand ensenhava dins l'èst de França, legissiá la cronica occitana d’un jornal quand se mainèt qu’èra la lenga de sa Tèrra, que la compreniá mas la coneissiá pas pro. De retorn al País, per mestrejar l’occitan (ja que l'ausissiá quand èra pichon dins son vilatge e mai tard dins la bèla-familha) se botèt a l’estudiar en autodidacte puèi prenguèt de corses per correspondéncia. Comencèt a escriure son primièr roman aprèp aver fach un exercici d’escritura per sos corses. Professor d'espanhòl retirat, ara se consacra a la redaccion d’obratges en occitan dins la varianta lengadociana.
Filantròp, Sèrgi Gairal faguèt de reviradas de l’espanhòl a l’occitan mas tanben al revèrs. Participèt a confeccionar lo metòde d’aprendissatge Cap a l’occitan (IEO 2008).
Foguèt amic amb Cristian Laus e Joan de Cantalausa.
Se maridèt e aguèt tres mainatges, una dròlla e dos dròlles.
Lo mond de Sèrgi Gairal[modificar | Modificar lo còdi]
Dins la màger part de son òbra literària, sèm dins un mond ont los personatges son de locutors occitans naturals. Los protagonistas pòdon viure e s’exprimir naturalament dins lor lenga mairala. Los quites animals, quand son los personatges principals, an tanben la facultat de pensar e parlar en occitan.
Òbras[modificar | Modificar lo còdi]
Romans
- Lo barracon, 1996
- Un estiu sus la talvera, 2001
- Delà la mar, 2004
- Tango d’estiu en Roergue, 2009
- Lo fuèlh rosegat, 2010
- Lo puèg de las fadas, 2011
- Las vacanças de Pascas, 2013
- La nena del pont, 2013
- Dins una balma del Sidòbre, 2014
- Lo papagai e lo robòt, 2016
- Lo professor Cric, 2017
- Le troubadour d’Ibiza, 2018
- Confidéncias felinas, 2019
- Lo secrèt de Juli, 2020
- Una sietada de reponchons, 2022
Autres tipes d’obratges
- 365 istorietas nòstras, 2012
- Mots crosats d’òc, 2014
- Nòu contes de Nadal d’endacòm mai, 2014 (obratge collectiu)
- Tròces de vida, 2021
Reviradas
- Allende los mares, 2006
- L'ingeniós gentilòme Dòn Quichòt de la Mancha, 2014
- Lo teatre de Miguel de Cervantes : Entremeses, 2018
Ligams[modificar | Modificar lo còdi]
https://sites.google.com/view/sergegayralauteur/accueil
Entrevista amb l’autor del 31 de decembre de 2021