Pulsa diNura

Un article de Wikipèdia, l'enciclopèdia liura.
Salta a la navegació Salta a la cerca

Pulsa diNura (פולסא דנורא en aramèu, çò qui vòu díser "hoets de huec", tèrme qui designa las es·hlamas de forma estreta e alongada, parièr en occitan per "lengas de huec") qu'ei lo nom balhat a un rituau cabalistic dens lo quau òm invoca los anjos de la destruccion tà blocar lo perdon celèste taus pecats d'un individú en tot provocar totas las malediccions contiengudas dens la Bíblia qui deven entrainar la soa mort. Puishque la Torah interditz de pregar tà que quacòm maishant e arribe a ua auta persona, la responsa que's presenta devath la forma de pregar tà que lo mau d'aquera persona e's morisca tà har vàder ua persona justa. La hont d'aqueth rituau modèrne ne's trapa pas dens la Cabala mes au miei deus manuaus de magia judiva de l'Antiquitat, en particular lo Sefer haRazim e la Ḥarba deMoshe.

L'expression qu'apareish per exemple dens lo tractat Hagigah 15a deu Talmud de Babilònia au respècte de la pena infligida per Diu a l'anjo Metatron, e dens lo Sefer haZohar (ua de las òbras classicas de la Cabala) au respècte deu castig celèste contra la persona qui ne compleish pas las soas obligacions religiosas.

Bèths judius ultraortodòxes aderents de la Cabala que desvolopèn l'idèa de lançar un malefici contra un pecaire, qui aperèn Pulsa diNura. La ceremònia que's hè dens un cemitèri a miejanueit; après bohar uas candèlas negras e sonar lo shofar, lo cap deu minyan o quorum de 10 òmis adultes necessari tà la recitacion de las pregàrias mei importantas de tot ofici o de tota ceremònia judiva, que demanda a Diu de condemnar e d'eliminar l'amna deu subjècte per'mor d'estar ua menaça contra lo pòble judiu.