Omega (mòstras)

Un article de Wikipèdia, l'enciclopèdia liura.
Sauter à la navigation Sauter à la recherche
Un calibre 38.5 d'una Gousset Omega (1941).

Omega es una entrepresa soïssa de relotjariá establida a Bienne. Apartèn a Swatch Group.

Per son ancianetat, sa longevitat, sa visibilitat (cronometratge esportiu, conquista espaciala) e sa talha, Omega es una dei societats principalas de l'industria relotgiera soïssa. D'efèct siguèt la pioniera en matèria d'industrializacion de la produccion (mecanizacion, produccion de massa). Outra l'excelléncia dei produchs, reconeissuda per de prèmis internacionaus fòrça nombrós, siguèt tanben un dei luecs de la lucha obriera e dau melhorament progressiu dei condicions de trabalh.

Uei, après lei torments e leis erraments provocats per l'invasion dau qüars e dei produccions japonesas deis ans 1970, la marca es de nòu una figura de proa de l'industria. Omega desvelopèt de solucions tecnicas originalas (escapament coaxiau, calibres de la maion) e l'estil siguèt modernizat. Coma apartèn a Swatch Group, si situa encuei dins lo segment "prestigi" dau mercat, e certanei dei produccions amiran clarament lo posicionament dins lo segment "luxe". De mai, fa quauques ans que la societat desvelopa un sector joielariá.

Fidèla a la region biennesa, Omega a pasmens esplechat de sucursalas o d'ataliers a Cortébert, Genèva, Köniz, Lausana, Le Sentier, Les Genevez e Villeret.

La companhiá es activa dins lo cronometratge esportiu, lo tractament e l'afichatge dei donadas despuei 1909. Assumissèt aqueu pretzfach lo premier còup au moment dei Juecs Olimpics d'estiu de 1932 a Los Angeles e, mai recentament, au moment dei Juecs Olimpics de Turin en 2006, de Beijing en 2008 e de Vancouver en 2010.