Ofensiva Brusilov

L’Ofensiva Brusilov es lo nom donat a un ensemble d'operacions militaras ofensivas russas menadas per lei fòrças dau generau Alekseï Brusilov dau 4 de junh au 20 de setembre de 1916 sus la partida sud dau frònt de l'Èst. Opausèt 55 divisions russas (633 000 òmes) a 49 divisions germanoaustrianas (467 000 òmes). L'objectiu dei Rus èra d'aprofichar la concentracion dei fòrças alemandas a Verdun e austroongresas en Itàlia per organizar una ataca poderosa còntra lei fòrças austroongresas. D'efiech, en març, una temptativa similara dirigida còntra leis Alemands s'èra acabada per una desfacha russa saunosa dins lo sector dau lac Naroch.

Fisada au generau Alekseï Brusilov, la preparacion de l'ataca foguèt ben organizada amb l'adopcion de tacticas novèlas (reconeissença aeriana, coordenacion aviacion-artilhariá, utilizacion de gas de combat, etc.), un entraïnament eficaç dei tropas e una volontat de cercar lei ponchs febles dei defensas advèrsas. En fàcia, leis Austrians demorèron largament passius. Lo 4 de junh de 1916, l'ofensiva foguèt dirigida còntra Galicia onte lei defensas austrianas s'afondrèron rapidament. Alemanha foguèt alora obligada de mandar de renfòrç importants per estabilizar lo frònt. Aquò empachèt lei Rus d'esplechar son succès. A partir d'aost, leis Empèris Centraus capitèron de tornar formar de linhas defensivas. Lo 27 d'aost, aqueu succès entraïnèt l'intrada en guèrra de Romania, mai lo país s'afondrèt rapidament e lei Rus deguèron ajudar lei rèstas de l'armada romanesa a resistir ais ofensivas austroalemandas.

Lei Rus conquistèron un territòri de 38 000 km² e captuèron 1 700 pèças d'artilhariá. Perdiguèron definitivament 550 000 òmes, mai a tèrme cort, sei pèrdas èran d'aperaquí un milion d'òmes. A tèrme lòng, aquela victòria parciala aguèt d'efiechs negatius sus l'armada russa. Foguèt pas aisat de remplaçar leis oficiers dispareguts e la propaganda revolucionària se difusèt pauc a cha pauc dins lei rengs. D'un biais generau, lo morau declinèt car lei Germanoaustrians avián resistit en despiech dei succès obtenguts. En fàcia, leis Empèris Centraus perdiguèron 1,2 milions d'òmes (1,5 milions a tèrme cort). La màger part d'aquelei pèrdas èran concentradas dins l'armada austroongresas. D'efiech, l'armada de Viena èra la victima principala de l'ofensiva amb 616 000 tuats, bleçats e dispareguts e 327 000 presoniers. Àustria-Ongria perdiguèt ansin son influéncia sus la conducha de la guèrra e l'emperaire Francés Josèu assaièt de negociar secretament la fin de la guèrra amb l'Entenduda. Enfin, leis Alemands perdiguèron 350 000 òmes e deguèron transferir de resèrvas per comolar lei traucs dins lei defensas. Aquò permetèt ai Francés de tornar prendre l'avantatge a Verdun.

Ligams intèrnes

• Frònt de l'Èst (1914-1918).

Bibliografia

• (fr) Jean-Paul Bled, L'Agonie d'une monarchie : Autriche-Hongrie 1914-1920, París, Taillandier, 2014, 464 p.
• (fr) Max Schiavon, L'Autriche-Hongrie la Première Guerre mondiale : La Fin d'un Empire, París, Éditions SOTECA, 14-18 Éditions, coll. « Les Nations dans la Grande Guerre », 2011, 298 p.
• (fr) Alexandre Sumpf, La Grande Guerre oubliée : Russie 1914-1918, París, Perrin, 2017, 607 p.