Los Secrets dau Diable
Los Secrets dau Diable contats en patoàs per un Paludèir de Begla es libre anonime en gascon bordalés pareishut en dus temps : 1878, probable coma roman-fuelheton, apuei 1879 ende l'estampaire-librari bordalés Emili Crugy. N'es pas en realitat un sol obratge, mès duias novelas apegadas : Lo Sabat e La Galipòta. Las duias son totun religadas. L'autor probable, Augusti Germont, èra barricaire a Sent-Ujan, coma de Begla, e adjunt au maire, de tendéncia republicana de gaucha.
La permèira partida, intitolada Los Secrets dau Diable, se desrotla a Virambits, dens la comuna de Begla. Conta las aventuras e los torments dau Crestaire, sorcièr e volur, amorós de la Brutlòta, una auta sorcièra. Un pilòt de personatges apareishen, rebats de la societat rurala bordalesa dau siègle XIX.
La segonda partida, intitolada La Galipòta, se desrotla a Cauderan. Es un vaudeville a l'un còp borlèsc, politic e classic dens sa factura.