Loïsa Paulin
Loïsa Paulin (en francés Louisa Paulin; Reialmont, 2 de decembre de 1888 – Reialmont, 23 d'abril de 1944) foguèt una escrivana occitana d'Albigés.
Biografia
[modificar | Modificar lo còdi]Loïsa Paulin nasquèt en 1888 a Reialmont dins una familha pagesa que l'occitan i rajava abondosament. Foguèt sonque a l'escòla que s'inicièt e aprenguèt lo francés. Estudièt a l'Escòla Normala de las regentas d'Albi en 1904. Venguèt regenta dins mantes vilatjòts tarneses (coma Velhas o Salvanhac) e se maridèt en 1908. Aguèt dos enfants mas totes se moriguèron pichonèls. Aprèp son divòrci en 1912 venguèt professora a Albi e puèi a Tula ont demorèt fins a 1930. En 1930 tornèt a l'Escòla Primària Superiora d'Albi. Pasmens per encausa de malautiá deguèt abandonar l'ensenhament quand aviá 44 ans (cap a 1932) e tornèt prendre sa retirada dins son país nadiu de Reialmont. Foguèt a partir d'aquel retorn al país que s'avodèt a l'escritura. Estudièt l'occitan per tal de lo poder escriure e aital faguèt la coneissença d'Andrieu Jacme Bossac e mai Prospèr Estiu, Antonin Perbòsc e Josèp Salvat a l'Escòla Occitana. En seguida obtenguèt dos prèmis de l'Acadèmia dels Jòcs Florals e a la debuta dels ans 1940 espeliguèron sos primièrs poèmas en occitan. Pasmens la malautiá, una neuropatia amiloïda, l'anequelissiá pauc a cha pauc, perdèt dapasset la vista e èra atacada per la paralisi. Gaireben òrba, dictava sos poèmas e sas letras a las gents que la venián visitar. Acabèt per morir d'aquela terribla malautiá lo 23 d'abril de 1944.
Òbras
[modificar | Modificar lo còdi]- Sorgas (1940)
- La Ronda dels Mòrts (1941)
- Fresca (1942)