Leontopithecus rosalia

Un article de Wikipèdia, l'enciclopèdia liura.
Salta a la navegació Salta a la cerca

Lo tamarin leon daurat es un primat endemic de Brasil, de la familha dels Callitrichidae e del genre Leontopithecus. Es present unicament dins la selva atlantica brasiliana, dins l'Estat de Rio de Janeiro, e segon d'unes autors tanben dins lo sud d'Espírito Santo. A l'ora d'ara se trapan principalament dins la resèrva biologica de Poço das Antas e dins la resèrva biologica d'União, e vivon dins las plus nautas estratas de la selva primària. Se pòdon encontrar tanben dins las espandidas de selvas segondàrias. Èra autrecòps considerat coma una sosespècia, uèi es una espècia a part entièra, coma las autras espècias de tamarins leons. Las pròbas d'estudis filogenetics mòstran que lo tamarin leon negre es l'espècia pus pròche del tamarin leon daurat. I a pas de fossil conegut de l'espècia.

Amb d'autres tamarins leons, es lo sòci pus bèl de la sosfamilha dels Callitrichinae e pòt pesar fins a 800 g. Lo pelatge varia del daurat a l'iranja amb una crinièra caracteristica, que li donèt son nom popular. Ten d'arpas en plaça de las onglas e lo tresen det de la man es fòrça long e servís per cercar de predas. Lo dimorfisme sexual es pas marcat. Lo cran es pichon e mens robust que los autres tamarins leons. A 30 dents, las incisivas essent similaras als ulhals.

Son d'animals diurnes e fòrça actius a las primièras oras del matin. Los comportaments socials son fòrça similaris a los dels autres primats. Vivon en grops de 9 individús maximum, organizats en grops familials, la poliandria essent correnta. La poliginia se pòt produire dins una mendra mesura. Los territòris varian en talha e pòdon aver fins a 217 ectaras de superfícia. La fragmentacion de l'abitat a fait cavalcar nombroses territòris. Son d'animals omnivòrs, se noirrisson de fruits, d'invertebrats e de pichons vertebrats pendent la sason de las pluèjas e de nectar pendent la sason sèca. An un repertòri variat de vocalizacions, que son emesas dins des contèxtes especifics. Donan naissença a de bessons après una gestacion de 130 jorns. Los mascles ajudan s'ocupar de la progenitura, e de la progenitura dels ans passats.

Es una espècia en perilh d'escantiment, classada coma espècia en perilh per l'UICN e l'ICMBio. SE reproduson gaireben exclusivament dins la réserva biologica de Poço das Antas, e d'União e dins de fragments de selva a proximitat, dins lo bacin del flume São João, dins l'Estat de Rio de Janeiro. I a aperaquí 3 200 individús en libertat, gràcia a d'innombrables esfòrces de conservacion e de reproducion de l'espècia. Las populacions captivas son relativament importantas e establas. Lo tamarin leon d'aur es una espèce emblematica de la conservacion de la selva atlantica brasiliana.