Plan de Sant Miquèu

Un article de Wikipèdia, l'enciclopèdia liura.
(Redirigit dempuèi La Plana (Marselha))
Salta a la navegació Salta a la cerca

La plaça Joan Jaurés, conoissuda aperavans sota lo nom de Plan de[ref. necessària] Sant Miquèu, popularament afrancesat en La Plaine, es una plaça de Marselha que s'atròva entre lo baloard Chave e la Canabiera, en dessús de la linha de Tramway que parte de la gara de la Blancarda e que s'acaba a Noalhas. Fòrça conoissuda dei marselhés per son mercat, lo Plan de Sant Miquèu formava ambé lo cors Julian fins leis annadas 1970 lo còr dei mercats marselhés, que i demorava lo mercat de gròs. Uei i demòra un mercat au detalh ben provesit. Es tanben conoissuda la plaça Joan Jaurés per sei bars, restaurants e salas de concèrt que ne fan un dei luecs pus animats dei nuechs marselhesas.

Es dins aqueu quartier que s'atròvan d'associacions viradas devèrs la cultura occitana coma l'Ostau dau País Marselhés, Massilia Chourmo, MicMac ò lo liame. Leis grops de musica occitans coma D'Aquí Dub, Lo Còr de la Plana, Gacha Empega, Original'Occitana e Massilia Sound System virèron premier e totjorn viran dins lei nombrosei salas dau quartier. Aquela orientacion « occitana » dau quartier es pas nòva, qu'es au Teatre Nau, pròche lo Plan de Sant Miquèu que fuguèt presentada la Pastorala Maurel per lo premier còp, au sègle XIX. Tanben au començament dau sègle XX, un marselhés anomenat Loís Focard jogava de pichonei pèças de teatre fòrça populara en provençau au mitan de la Plaça. De notar tanben que Victor Gelu i demorèt un temps, au crosament de la Plaça e de la carriera de la bibliotèca.

Leis estrangiers que visitan Marselha s'estonan soventei-fes de son nom La Plaine estent que la plaça es ben de bòn un plan ! Sota l'influéncia dau francés, s'emplega de còp ara la forma La Plana per nomenar en occitan aquela plaça.