Gregòri IV
Gregòri IV (vèrs 795 - 25 de genier de 844) foguèt lo 101en papa de la Glèisa Catolica Romana d'octòbre de 827 au 24 de genier de 844. Succediguèt a Valentin (setembre-octòbre de 827) e foguèt remplaçat per Sèrgi II (844-847).
Fiu d'un patrician de Roma dich Joan, foguèt ordonat prèire dins lo corrent dau pontificat de Pascal Ièr (814-824) e venguèt cardenau-prèire de la Basilica Sant Marc de Roma. Foguèt elegit a son insaupuda per l'aristocracia romana e intronizat maugrat sei protestacions dins lo corrent d'octòbre de 827. Aquela eleccion foguèt ratificada lo 29 de març de 828 per l'emperaire Loís lo Pietós e au començament de son pontificat, Gregòri IV foguèt fòrça dependent dau poder carolingian.
Pasmens, lei conflictes entre Loís lo Pietós e sei fius anavan pauc a pauc permetre au papa de prendre mai e mai d'autonòmia e de criticar leis accions dei senhors carolingians. Per exemple, en 829, critiquèt l'atribucion d'un reiaume a Carles lo Calvet ò en 830, declarèt que l'emperaire deviá reprendre sa frema mandada aperavans dins un covent. En 833, prenguèt una dimension novèla e assaièt de negociar un acòrd de patz entre Lotari e son paire. Se turtèt a la resisténcia deis evesques fidèus ais autrei fraires de l'emperaire e afirmèt alora la primautat dau poder de la Glèisa sus lo poder imperiau. Pasmens, sa temptativa mau capitèt e Lotari aprofichèt lei negociacions menadas per lo papa per organizar un complòt. Loís lo Pietós foguèt brèvament destituit per son fiu (833-834). Après sa restauracion, lo papa foguèt obligat de se justificar de sa participacion involontària au complòt de Lotari. Aquò aguèt per consequéncia que Gregòri IV limitèt per la seguida seis intervencions politicas a de temptativas de mediacion prudentas entre lei fius de Loís lo Pietós.
La fin de son pontificat foguèt ansin mai consacrada ai construccions e ai questions religiosas. En particular, ordonèt la transformacion de la Basilica de Sant Marc de Roma segon l'estile bizantin, la restauracion de l'atrium de la Basilica de Constantin, la restauracion d'una partida dei catacombas e la reparacion de l'aqüeducte de l'Aqua Trajana. En fòra de Roma, se preocupèt de restaurar e de fortificar lo pòrt d'Òstia per lo protegir còntra leis incursions dei piratas musulmans e d'establir de colonias novèlas dins la region de Roma.
Regardant leis afaires religiós, lo periòde de Gregòri IV foguèt marcat per la fin de l'iconoclasme bizantin e per divèrseis arbitratges entre evesques francs. Foguèt tanben obligat de luchar còntra lei pretencions dau patriarcat de Grado, sostengut per Lotari, de prendre lo contraròtle dau clergat d'Istria.