Gnathosaurus

Era prumèra trobalha deth pterosaure Ganthosaurus dejà auia sigut descrita en 1832 pes scientifics. Se'n trapèc pas arren mès enquia 1951.

Eth darrèr mès important genre de pterosaure de Solnhoffen trapat ei Gnathosaurus (maissa de reptil). Aguest ei tamben un aute pterosaure plan estranh. Es dus fossils discurberts son es soletes despulhes d'aguest animal, sonque conegut pes caucinoses de Solnhoffen.

Era prumèra trobalha, ua maissa inferior aislada, siguec dejà arreconeguda en 1832 en Bayreuth mès se pensèc qu'ère ua maissa de crocodil. Dempús, eth paleontològ Hermann von Meyer, de Frankfurt, l'aperéc coma Gnathosaurus subulatus (subulatus en latin vò díder coma un chot pera forma des sues dents).

Siguec pas probat qu'era creatura ère un pterosaure enquia se trapèc ua dusaua trobalha en 1951, damb un cran de 28 cm de longada. S'a trapat pas arren mès dera esqueleta mès ei pas impossible que uassi aisladi des ales e pates, d'autes pterosaures e encara per classar apertenhessen ara espècie Gnathosaurus.

Tot e qu'aguest ère un pterosaure gran damb ua ala d'aperaquí es 1,7 m, se pensa qu'ère un hiltrador. E açò qu'es sues dents son mès poderoses qu'es de Ctenochasma mès son pas tant denses. Sonque n'i a 130. Gnathosaurus auia ues dents qu'anauen entà darrèr damb un bec en forma de culhera. Coma Ctenochasma procristata, Gnathosaurus tamben auia un uas de cresta baish sus eth sòn cran.

Coma que es sues dents èren plan estranhes, Ctenochasma e Gnathosaurus son disparièrs d'autes pterodactyloides. Pr'açò se classen en ua familha propia, coneguda coma es Ctenochamatidae.

Hònt: The Illustrated Directory of Dinosaurs and Other Prehistoric Creatures, Greenwich Editions, 2005.