Georges Nguyen Van Loc
Georges Nguyen Van Loc (2 d'abriu de 1933, Marselha - 7 de decembre de 2008, Canas), dich « lo Chinés », es un comissari divisionari de polícia francés actiu de la fin deis ans 1950 a la fin deis ans 1980. Foguèt tanben escrivan e comedian. Es famós per son ròtle coma fondator e cap dau GIPN de Marselha.
D'origina vietnamiana, èra lo fiu d'un navegaire installat dins lo quartier dau Panier. Durant sa jovença, costejèt de personalitats coma Gaëtan Zampa (1933-1984) que venián dau meteis quartier. Nguyen Van Loc realizèt son servici militar en Argeria onte se destrièt durant d'escaramochas còntra lo FLN. Puei, jonhèt la polícia. En 1972, foguèt encargat de crear lo premier GIPN (« Grop d'Intervencion de la Polícia Nacionala ») per luchar còntra lo terrorisme e lo grand banditisme, per gerir de situacions de crisi (presa d'ostatges, forcenats) ò per protegir de personalitats importantas. Quitèt la polícia en 1989 après la gestion marrida d'una presa d'ostatges per Robert Broussard e en causa de desacòrdis a prepaus dau futur dau GIPN.
Durant sa retirada, escriguèt plusors obratges autobiografics e tenguèt lo sieu ròtle dins una seria televizada. Es enterrat dins lo cementèri Sant Pèire de Marselha. Durant sa vida, recebèt plusors medalhas e guierdons coma la Legion d'Onor, l'Òrdre Nacionau dau Meriti, la Crotz de la Valor militara, la Crotz dau combatent e la Medalha d'onor de la Polícia nacionala.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Georges Nguyen Van Loc e Jean-Max Tixier, Le Chinois : Le Chinois, t. 1, Presses de la Cité, 1989.
- (fr) Georges Nguyen Van Loc e Jean-Max Tixier, Le Chinois : Le Chinois, t. 2, Presses de la Cité, 1992.