Georg Thilenius

Georg Christian Thilenius (4 d'octobre de 1868 - 28 de decembre de 1937) foguèt un mètge e antropològ alemand.

Estudièt la medecina a Bonn e Berlin, e en 1896 recebèt son abilitacion per exercir coma anatomista a l'Universitat d'Estrasborg. Posteriorament participèt a d'expedicions scientificas en Tunisia e dins lo Pacific Sud. En 1900 venguèt professor d'antropologia e d'etnologia a l'Universitat de Breslau, e qualques ans mai tard, en 1904 foguèt causit coma director del Musèu d'Etnologie d'Amborg ont demorèt fins a 1935.

Coma director del Musèu d'Amborg, Thilenius se carguèt de la coordenacion de l'Expedicion Südsee de 1908-1910, un viatge scientific als territòris administrats per Alemanha en Micronesia e en Melanesia. L'expedicion compreniá Friedrich Fülleborn (1866-1933), Otto Reche (1879-1966) e Wilhelm Müller-Wismar (1881-1916). Mai de 15.000 objèctes e artifactes del Pacific Sud foguèron portats a Amborg, e una soma d'informacion considerabla que se chifrèt en 23 volums.