Fàcia amagada de la Luna

Un article de Wikipèdia, l'enciclopèdia liura.
Salta a la navegació Salta a la cerca
Fàcia amagada de la Luna fotografiada per Apollo 16.

La fàcia amagada de la Luna es l'emisfèri de la Luna que se situa en permanéncia del costat opausat a la Tèrra, l'autre essent nomenat fàcia vesedoira de la Luna. D'efièit, un sol e meteis emisfèri de la Luna es vesedor dempuèi la Tèrra, amor que la Luna ten un periòde de rotacion egal a son periòde de revolucion (27,3217 jorns), fenomèn sonat rotacion sincrona. L'autre emisfèri es doncas pas vesedor dempuèi la Tèrra, e foguèt pas fotografiat e cartografiat que mercé a las sondas espacialas, la primièra essent la sonda sovietica Luna 3 en 1959. Los primièrs òmes de l'apercebre directament foguèron l'equipatge de la mission Apollo 8 en orbita a l'entorn de la Luna en 1968.

La particularitat d'aquesta fàcia es d'aver una morfologia fòrça mai accidentada que la fàcia que gaita nòstra pianeta: rica en cratèrs e amb fòrça mens mars lunaras. Aquò perqué es pas protegida per la preséncia de la pianeta Tèrra, e pòt èsser pus facilament atencha pels objèctes venent de l'espaci, especialament los meteorits. Entre las mars presentas (pus pichonas que las de la fàcia vesedoira), cal senhalar la Mare Moscoviense, la Mare Ingenii, la parts amagadas de la Mare Orientala e de la Mare Australe. Per contre entre los nombroses cratèrs cal senhalar l'Apollo qu'atenh 520 km de diamètre. Las mars lunaras representan sonque 2,5% de sa superfícia respècte als 31,2% de la fàcia vesedoira.