Estat nacion

Un article de Wikipèdia, l'enciclopèdia liura.
Salta a la navegació Salta a la cerca
Carta lingüistica de Polonha, un Estat nacion europèu fòrça omogenèu format per lei Polonés e lei Cashobs.

Un Estat nacion es un concèpte politic que designa la juxtaposicion d'un Estat, es a dire una organizacion politica, e d'una nacion, es a dire un grop d'individús que se considèran liats entre elei per l'apartenéncia a un meteis grop. Sensa aquela coïncidéncia, se parla puslèu d'un Estat multinacionau.

Dos procès istorics de formacion d'un Estat nacion existisson :

  • l'Estat pòu preexistir e venir un Estat nacion s'un sentiment nacionalista se desvolopa au sen de la màger part de sa populacion. L'arquetipe d'aqueu cas es França que mena una politica activa dempuei l'Edat Mejana per redurre e escafar lei particularismes dei diferents pòbles de son territòri e leis unificar.
  • leis individús formant una meteissa nacion capitan de se dotar d'un Estat. D'exemples caracteristics son Alemanha ò Itàlia.

Dins lei dos cas, es un fenomèn lòng que dura generalament plusors generacions e que necessita un contèxte socioeconomic favorable e un activisme politic sostengut.

La teoria de l'Estat nacion foguèt fòrça sostenguda per lei partisans de la formacion d'Estats sus una basa etnica. En particular, foguèt un dei motors de l'aparicion d'estats indepedents en Euròpa Centrala e Orientala durant lei sègles XIX e XX. Foguèt contestada per lei marxistas qu'èran en favor de la solidaritat internacionala entre lei classas obrieras dei diferentei nacion. Pasmens, durant lei doas guèrras mondialas, lo proletariat de cada país s'engatjèt en favor de la defensa de son país. Lo concèpte d'Estat nacion es tanben criticat per lei federalistas europèus que pensan qu'es unicament una fasa de transicion entre leis Estats eissits de la feudalitat e un futur Estat europèu. Dins aquò, a l'ora d'ara, lei nacions e lo nacionalisme demòran de realitats importantas au sen dau procès de construccion europèa.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]