Eleccions regionalas en Sardenha de 2014
Las eleccions regionalas en Sardenha de 2014 se son debanadas lo 16 de febrièr de 2014. La causida de la data generèt una polemica dins la societat sarda que finalament es estada avançada de doas setmanas sul moment inicialament previst, lo 2 de març, çò que redusiguèt considerablament lo temps de preparacion e presentacion de las listas e dels candidats. Contràriament a l'escrutin anterior, se votèt sonque en un còp, la jornada de dimenge. Aqueste an, la lei electorala es estada modificada tornarmai, amb la Legge Regionale Statutaria del 12 de novembre de 2013. Aital es elegit president lo candidat qu'obten la majoritat (e mai siá relativa) dels sufragis.
A miègjorn lo taus de participacion èra de 11,36 % dels votaires, çò que representa una aumentacion leugièra en rapòrt al 10,38 % de las eleccions precedentas en 2009 que pr'aquò comptavan doas jornadas de votacions. Quand s'acabèron las eleccions que se podiá votar fins a 22h la participacion arribèt pas qu'a 52,23 %, mentre que durant las votacions anterioras aquesta atenhèt 67,58 %, siá un pauc mai de 15 % mens.
S'escrutèron los resultats l'endeman. Las eleccions marquèron la victòria del candidat d'esquèrra Francesco Pigliaru e la desfacha del governador actual Ugo Cappellacci. Michela Murgia se situèt en tresena posicion amb mens d'11 % dels sufragis.
Los candidats
[modificar | Modificar lo còdi]Lo governador sortent, Ugo Cappellacci, se representava coma candidat a la presidéncia de la region sostengut per Silvio Berlusconi. Lo Movimento 5 Stelle qu'obtenguèt de resultats excellents durant las eleccions precedentas se tornava pas presentar per encausa de conflicte intèrns. Pel primièr còp en vint ans, lo partit independentista Sardigna Natzione se presentava pas tanpauc. Per contra, aqueste an vegèt l'irrupcion sus la scèna sarda d'un projècte politic novèl, Sardegna Possibile, capitanejat per l'escrivana Michela Murgia, que vòl una autonomia mai importanta de l'isla e defensa l'autodeterminacion. Lo corrent independentista èra representat per Pier Franco Devias, candidat del Fronte Indipendentista Unidu. Los autres candidats èran Francesco Pigliaru del centre esquèrra, Gigi Sanna del Movimento Zona Franca e Mauro Pili del partit de drecha Unidos.