Drapèu gascon

Drapèu gascon

Descripcion

Un drapèu dab un hont arroi cargat d’un sautèr o crotz de Sent-Andriu blanca.

Origina

La sua origina n'ei pas coneguda. L'ipotèsi legendària d'un drapèu sanccionat per l'autoritat papau a l'assemblada de Gisors en 1288 n'ei pas averada (la Cronica de Roger de Hoveden ne'n hè pas estat). Que s'i nota totun que Sent-Andriu ei lo patron de Bordèu. 'De Gules (arroi) au sautèr d'argent' qu'èran las armas de Geoffrey de Neville, senescau de Gasconha au sègle XIIIau.

Qu'ei mei pertinent de situar la sua adopcion com drapèu deus Gascons dens lo demiei deu Felibritge au cap deu sègle XIXeu o a la debuta deu sègle XXau, o lavetz dens los demieis vasconistas deu sègle XXau.

Pertinéncia

Aqueth drapèu qu'acontenta las arrèglas de la vexillologia, especiaument dens la sua categoria de drapèu de pòble e de territòri : simplicitat, pas tròp de colors, legibilitat a distància.

Significacion

Aqueth drapèu qu'arrepresenta tots los país e terradors gascons (los principaus deus quaus son : Guiana bordalesa, Libornés, Vasadés, Bòrn, Bug, Lanas, Labrit, Marçan, Tursan, Xalòssa, Biarn, Armanhac, Lomanha, Bigòrra, Coserans, Comenge, Vath d'Aran, e d'autes) e lo pòble gascon tau com definit per l'airau lingüistica deu gascon. Adoncas qu'ei desparièr deus drapèus e banèras de província e país, l'usatge deus quaus ei legitim, qui non corresponen pas qu'a ua fraccion deu territòri gascon.

Las colors arroja e blanca que son plan arrepresentadas dens l'eraldic deus país gascons.

Qu'ac son hèra dens los usatges populars. La crotz qu'ei ad ua dab las talanquèras emparaderas de las areas.

Lo motiu que recep ua interpretacion de geografia fisica e umana : Capvath bordalés e guianés ; Darrèr costèr e landés, ; Capsús montanhòu ; Davant garonés.

La crotz de Sent-Andriu que segueish usatges plan atestats a l'oèst e au sud-oèst de l'Euròpa (Bascoat, Galícia anciana, etc.). Que s'insereish adoncas dens ua tradicion plan emplaçada.

Entà mei informacions : Gasconha