Donjon del Capitòli

Un article de Wikipèdia, l'enciclopèdia liura.
Salta a la navegació Salta a la cerca
Donjon del Capitòli o torre de l'Archiu

Lo Donjon del Capitòli foguèt bastit al sègle XVI; es l’anciana Torre de l'Archiu o Torre dels Consistòris que data de l'epòca que los Capitols administravan la vila. Aquela construccion uèi situada darrièr lo Capitòli aviá per ròtle de renfortir lo barri de defensa de la pòrta Vilanòva e d'aparar los archius de la vila. Foguèt bastit en quatre ans per Pèire de Naves puèi Laurent Clary. En 1557, un arsenal o cambra de l'artilhariá foguèt bastit al costat del donjon. Aquel foguèt restaurat per Viollet le Duc entre 1873 e 1887 perque menaçava de s'esfondrar. Apondèt alara al suc un teulat d'estil flamenc (de lausa blava) amb un cloquieron fòrça original dins una vila ont d'ordinari se bastís de brica (sus las faciadas) e de teules (suls teulats), tipic de l'estil miègjornal. A l'ora d'ara aquel bastiment es l'Ofici del Torisme de la vila de Tolosa, ont se tròban libres, mapas, prospèctus, e fòrças informacions sus la region.

Es constituit sus dos nivèls: la cambra nauta (ont se conservèt los archius fins en 1946) e de la cambra bassa o sala del Pichon Consistòri que servissiá de sala de reünion pels Capitols. I aguèt pendent mai de dos sègles una estatua nomenada "Dame Tholosa" amb dins una man una giroleta e dins l'autra los escuts de la vila. Foguèt desmontada e restaurada en 1827 puèi expausada fàcia al Mercat de Grans en 1834 sus la colomna Dupuy.

Articles connèxes[modificar | modificar la font]