Dmitar Zvonimir

Dmitar Zvonimir (mòrt lo 20 d'abriu de 1089, Knin) foguèt rèi de Croàcia de 1075 a 1089. Succediguèt a Peter Kresimir IV (1059-1075) e foguèt remplaçat per Stjepan II (1089-1091).

Ban d'Eslavònia de 1064 a 1074, foguèt nomat duc de la Dalmàcia Croat per lo rèi Peter Kresimir IV en 1074. Aquò ne fasiá son successor designat e son conselhier principau. Ansin, Dmitar Zvonimir foguèt elegit rèi per l'aristocracia croata e coronat lo 8 d'octòbre de 1076 ambé lo sostèn dau papa Gregòri VII (1073-1085).

Establiguèt sa capitala en Knin e contunièt la politica de son predecessor d'organizacion d'un estat modèrne. Son rèine foguèt donc caracterizat per lo mantement de l'aliança ambé la papautat (abolicion de l'esclavatge, defensa de la Glèisa, introduccion dei reformas de Gregòri VII... etc.), la perseguida de la confrontacion ambé l'Empèri Bizantin (aliança ambé lei Normands còntra Constantinòble e Venècia... etc.) e per una activitat legislativa non negligibla (estatut dei vilas... etc.). Aquò li permetèt de mantenir la patz e la prosperitat economica au sen de son reiaume durant tot son rèine.

En revènge, en despiech dau renfòrçament de l'autoritat reiala, sa mòrt entraïnèt una guèrra de succession fòrça violenta. Lei combats foguèron a l'origina de l'afondrament dau reiaume que passèt sota senhoriá ongresa — mai mantenguèt son autonòmia intèrna — en 1102. Divèrsei versions de sa mòrt existisson. La principala depinta un decès naturau mai una segonda parla d'un assassinat organizat per d'adversaris d'una expedicion militara, demandada per lo papa, còntra lei Turcs que menaçavan Constantinòble.

Liames intèrnes

• Estèla de Baska, tèxte croat medievau parlant dau rèine de Dmitar Zvonimir.
• Lista dei sobeirans de Croàcia.