Depression (meteorologia)
Una depression es, en meteorologia, una zòna sarrada de pression atmosferica pus febla que lei regions vesinas. Es ansin sovent amb una meteo instabla car la demenicion de la pression atmosferica favoriza la formacion de corrents d'aire ascendents qu'entraïnan la formacion de nívols e de precipitacions. De mai, lei massas d'aire an tendància de se dirigir vèrs lei depressions, çò que pòu engendrar de vents violents. Coma per leis anticiclòns, existís de depressions mai ò mens permanentas que tènon un ròtle centrau dins la meteorologia mondiala en causa de son influéncia sus la circulacion atmosferica.
Definicion[modificar | Modificar lo còdi]
D'un biais generau, existís dos tipes de depressions :
- lei depressions termicas son eissidas d'un rescaufament locau fòrça important que se mantèn en plaça a la superficia terrèstra. Aquò entraïna un rescaufament de l'aire que vèn alora mens dens. Aqueu tipe de depression es generalament liat au raionament solar. Dins un cas classic, se forma donc au començament dau jorn e disparéis au començament de la nuech. Dins aquò, dins de regions caudas (desèrt...), pòu aver un caractèr quasi permanent. En causa de son origina locala, l'intensitat de la depression demenís amb l'altitud.
- lei depressions dinamicas son entraïnadas per la circulacion atmosferica ela meteissa. D'efiech, dins certanei cas, aquela circulacion mèna a la destenduda de massas d'aire e, donc, a la formacion d'una zòna de bassa pression. Au contrari de la depression termica, l'intensitat de la depression dinamica aumenta amb l'altitud.
Una partida dei depressions observadas per lei meteorològs son congreadas per lei dos fenomèns. Dins aqueu cas, son dichas depressions termodinamicas.