Conselh general (institucion francesa)
En França, lo conselh general es l'amassada deliberativa d'un departament.
Aquel nom ven de que, abans 1982 e la creacion dels conselhs regionals, los conselhs generals èran la mai nauta amassada locala.
Composicion[modificar | Modificar lo còdi]
Los conselhièrs generals son elegits al sufragi universal dirècte, segon un escrutinh uninominal dels dos torns, amb un conselhièr per canton. Los mandats son de sièis ans, renovelats per mitat cada 3 ans.
Foncionament[modificar | Modificar lo còdi]
Lo conselh general se causís una comission permanenta (amb un president e maites vicepresidents), qu'es l'organ executiu del departament. Le president es lo cap de l'administracion departamentala.
Lo President del Conselh general reçaup una indemnitat mesadièra de 5397 €.
Pels conselhièrs generals, l'indemnitat depend de la populacion del canton :
- mens de 250 000 abitants : 1475 € per mes.
- de 250 000 a 500 000 abitants : 1844 € per mes.
- de 500 000 a 1 000 000 abitants : 2213 € per mes.
- de 1 000 000 a 1 250 000 abitants : 2397 € per mes.
- mai de 1 250 000 abitants : 2582 € per mes.
Competéncias[modificar | Modificar lo còdi]
Las competéncias màgers del Conselh general son :
- l'accion sociala : insercion de las personas amb dificultats, RMI, proteccion de l'enfança (Proteccion mairala e infantila, Ajuda sociala a l'enfança), ajuda als invalids e als vièlhs, prevencion sanitària ;
- las rotas : gestion de las rotas departamentalas e de las rotas nacionalas d'interès local, dels transpòrts e dels transpòrts escolars per autocarri ;
- l'educacion : gestion dels collègis ;
- la cultura : archius departamentals, bibliotèca departamentala de prèst, eventualament castèls o musèus ;
- lo desvolopament local: ajudas a las associacions, a las comunas.
Istòria[modificar | Modificar lo còdi]
La lei del 22 de decembre de 1789 prevei la creacion, dins cada departament, d'una amassada de 36 elegits, lo conselh de departament. Aquel conselh es suprimit per la lei del 14 de frimaire de l'an II (4 de decembre de 1793). Sera restablit jol nom de conselh general per la lei del 28 de pluviôse de l'an VIII (17 de febrièr de 1800). Los conselhièrs son pr'aquò desenant nomenats pel govèrn. Es sonque en 1833 que los conselhs generals son tornarmai elegits, e al sufragi censitari. L'eleccion al sufragi universal sera instituida per la lei del 3 de julhet de 1848.
Al començament, lo president èra elegit cada an. Dempuèi la lèi del 10 d'agost de 1871, lo conselh general s'elegís lo president a cada renovèlament. Fins a 1982, lo prefècte èra a l'encòp lo representant de l'Estat dins lo departament e l'executiu departamental.