Conferéncia de Potsdam
La Conferéncia de Potsdam es una conferéncia internacionala que reüniguèt lei venceires principaus (URSS, Estats Units e Reiaume Unit) dau 17 de julhet au 2 d'aost de 1945 per reglar lei questions pausadas per la victòria deis Aliats en Euròpa. Reüniguèt Estalin e Molotov per l'Union Sovietica, Truman e Byrnes per leis Estats Units e Churchill e Eden (remplaçats per Attlee e Bevin lo 28 de julhet) per lo Reiaume Unit.
L'intrada en guèrra de l'URSS còntra Japon foguèt confiermada e Moscòu s'associèt a l'ultimatum angloestatsunidenc qu'exigiguèt una capitulacion sensa capitulacion de l'armada nipona. La conferéncia definiguèt tanben lei principis directors dau tractament d'Alemanha après la guèrra : desarmament, desmilitarizacion, desnazificacion, preparacion dei tractats de patz, descentralizacion, reparacions de guèrra, partiment de la Prússia Orientala entre l'Union Sovietica e Polonha, ocupacion per lei venceires, etc. Enfin, foguèt decidit d'integrar França e China dins lo conseu dei Cinc Grands encargats d'elaborar lei tractats amb lei satellits d'Alemanha (mai d'exclure França dei negociacions generalas amb Itàlia).
Divèrsei revendicacions sovieticas foguèron refusadas (contraròtle dau mandat libian, contraròtle deis Estrechs) e leis Occidentaus protestèron còntra lo desvolopament de l'influéncia sovietica en Romania e en Bulgaria. Pasmens, d'un biais generau, Estatsunidencs, Britanics e Sovietics evitèron de discutir dei subjèctes malaisats per mantenir en plaça la Granda Aliança fins a la capitulacion de Japon. La Conferéncia de Potsdam es ansin una etapa vèrs lo començament de la Guèrra Freja.