Chantal Goya
Chantal de Guerre, dicha Chantal Goya, nascuda lo 10 de junh de 1942 a Saïgon (Indochina), es una actritz e sustot cantaira francesa.
Es la cosina alunhada del actor francés Claude Rich e del cantaire francés Philippe Lavil.
La familha de Guerre se tira de l'Indochina francesa en 1946, a la debuta del conflicte d'independéncia, e s'installa alavetz a Remiremont, en Lorena, la region d'origina de son paire.
Son rencontre ambe Jean-Jacques Debout que vendrà son espós es una virada dins sa vida, vist que voliá inicialament èsser jornalista : Jean-Jacques Debout li presenta Daniel Filipacchi, que ven alavetz son productor, coma per Sylvie Vartan o quitament Jean Ferrat. Jean-Jacques Debout comença alavetz de compausar per ela de cançons.
Chantal Goya enregistra alavetz qualques disques yéyés jos la direccion artistica de Mickey Baker. Pauc après, arrèsta sa carrièra de cantaira per s'ocupar de sos mainatges.
En 1975, Jean-Jacques Debout li escrich e compausa la cançon Adieu les jolis foulards. Aquela cançon obten una pichona capitada : sa carrièra de cantaira torna desmarrar.
Jean-Jacques Debout decidís de sortir lo disc, e en 1976 Chantal Goya signa un contracte de cinc ans en çò de RCA. L'annada seguenta sortís un primièr album, puslèu pels mainatges, Voulez-vous danser grand-mère ?, que conten tanben los tubes infantils Allons chanter avec Mickey e Un Lapin.
Chantal Goya ven alavetz la cantaira per mainatja la mai populara de França ambe entre autras sas capitadas Bécassine, C'est Guignol !, Monsieur le chat botté, Mon Pinocchio, Pandi Panda, Snoopy etc.
Es tanben l'interprèta dels generics dels dessenhs animats presats pels mainatges franceses coma per exemple Les Misérables (1980), Bouba le petit ourson (1981) o encara Les quatre filles du docteur March (1984).
Sa popularitat tomba a la fin de l'annada 1985, benlèu pr'amor d'una emission televisada (Le Jeu de la vérité, presentat lo 13 de decembre de 1985 per Patrick Sabatier) que faguèt escandal e ont s'i discreditèt en dirècte.