CREO Tolosa

Un article de Wikipèdia, l'enciclopèdia liura.
Salta a la navegació Salta a la cerca

Lo CREO Tolosa, Centre Regional dels Ensenhaires d'Occitan de l'acadèmia de Tolosa, es estat creat en 1969. Recampa dempuèi totis los ensenhaires d'occitan, de la mairala a l'universitat. Es devengut un partenari important de las collectivitats territorialas. Li devèm la creacion del CAPES d'occitan, del CRPE bilingüe, de la preséncia d'Inspectors de lenga e cultura regionala coma d'un fum de Conselhièrs Pedagogics d'occitan departamentals e de pòstes de professors d'Universitat o d'IUFM.

Creat en 1969 per Andrieu Lagarda, son president n'es alara Nicolau Rei Bèthvéder, qu'es tanben vice-president de la FELCO. Es ara al dintre de la FELCO, Federacion dels CREOs regionals, una fòrça de proposicion per l'occitan a l'escòla e dins la societat nòstra.

Lo CREO Tolosa recampa los ensenhaires d'occitan, que fascan d'ensenhament de lenga e cultura occitana jos totas las fòrmas possiblas, extensiva (opcion d'occitan al collègi, al licèu, lenga viva 2 o 3) coma intensiva (ensenhament bilingue).

Sus la sola Acadèmia de Tolosa, mai de 30 000 joves fan d'occitan jos una fòrma o l'autra. Ara, mai d'un vintenat de sites bilingües son dubèrts dins l'Educacion Nacionala, amb gaireben 2000 dròlles que fan d'occitan dins la mitat de son emplec del temps

Lo CREO es partenari regular de las instàncias oficialas (Ministèri de l'Educacion Nacionala, Rectorats de las 9 Acadèmias concernidas per l'occitan, Conselhs Regionals, Conselhs Generals, Comunas...); li devèm fòrça avançadas dins l'Educacion Nacionala, per l'escòla, coma per la socializacion de la lenga nòstra.

Dempuèi la disparicion de la region Miègjorn Pirenèus, lo CREO tornèt trobar lo sieu nom original de CREO de l'acadèmia de Tolosa en novembre de 2016. (De 1989 a 2016 se sonèt CREO Miègjorn Pirenèus).

Amb los còps portats a l'ensenhament de l'occitan amb la refòrma dels collègis de 2016 e la dels licèus, volguda pel ministre Blanquer, de 2019, lo CREO Tolosa foguèt a l'iniciativa d'una manifestacion per la defensa de l'ensenhament de l'occitan a Tolosa, lo 17 de febrièr de 2019 qu'amassèt 5000 personas. Lo CREO Tolosa obtenguèt l'unitat de l'occitanisme sus aquela question.


Ligam extèrne[modificar | modificar la font]

Siti oficial del CREO Tolosa