Centre Regional d'Estudis Occitans (CREO) de Nauta Garona
Lo CREO 31 es una associacion d'ensenhaires de l'Educacion nacionala, de la mairala a l'universitat, que trabalha a la transmission de la lenga e de la cultura occitanas en mitan escolar; es dubèrt a tota persona qu'òbra a aquel objectiu, que siá ensenhaire o pas.
Per sas accions pròprias o en coordinacion amb d'autras associacions de Nauta Garona, lo CREO 31 far de proposicions als poders publics per far viure la lenga e la cultura occitanas dins la societat. L'ensenhament de l'occitan s'adreça a totes: permet de desvolopar las aptituds intellectualas, lingüisticas e culturalas, lo mestritge del lengatge en general e del francés en particular, las aptituds a l’aprendissatge de las lengas, tot en aprestant los escolans a viure d’identitats de mai d’un nivèl, pluralas e complementàrias, dins lo país ont son o endacòm mai.
Per tant, lo CREO 31 vòl melhorar las condicions d'ensenhament, tant pels escolans coma pels ensenhaires, e desvolopar aquel ensenhament a totes los nivèls segon dos axes:
- l'iniciacion-sensibilizacion per totes
- l'ensenhament bilingüe francés-occitan
Lo CREO 31 es la seccion de Nauta Garona del CREO Tolosa que participa al Conselh Academic per l'Ensenhament de l'Occitan presidit pel rector de l'Acadèmia de Tolosa. I demandam que l'ofèrta d'ensenhament siá progressivament generalizada amb de mejans e de tèxtes oficials per aquò far.
En Nauta Garona, lo CREO 31 es tanben portaire del projècte « Animòc » en partenariat amb lo Conselh Regional, lo Conselh General, las comunas e l'Inspeccion Academica. S'agís d'animacions regularas dins las escòlas per ajudar los mèstres a prene en compte la lenga e la culturas occitanas amb sos escolans. D'autres projèctes son a l'estudi, en particular de plaquetas pedagogicas per integrar l'occitan dins la descobèrta de lòcs remirables del departament (passejadas istoricas, Tolosa, bastidas, païsatges, ...)
Lo CREO es tanben un lòc de conselh, d'ajuda e d'escambis pels ensenhaires.
Son sèti social es a l'Ostal d'Occitània de Tolosa: 11, carrièra Malcosinat 31 000 Tolosa
