Blaverisme

Un article de Wikipèdia, l'enciclopèdia liura.
Bandièra oficiala del País Valencian amb sa franja blava que la diferéncia de la catalana e que donèt son nom al blaverisme

Lo blaverisme es un movement politic del País Valencian que sa tòca primièra es de promòure un secessionisme lingüistic en afirmar que lo valencian es pas una varietat de la lenga catalana mas una lenga diferenciada. Apareguèt clarament en tèrras valencianas, mai que mai dins la capitala València, cap a la fin de las annadas 1970 per reagir contra lo nacionalisme valencian impulsat per Joan Fuster. Lo movement, ligat als corrents conservadors e reaccionaris espanholistas, deu son nom a la franja blava qu'apareis sus la bandièra oficiala valenciana. Fins recentament aquesta apellacion èra generalament percebuda coma pejorativa e èra essencialament emplegada pels mitans que defensavan l'unitat lingüistica.