Batalha de la Mar dei Filipinas

Fotografia d'un pòrta-avions e dos destroièrs japonés assaiant de defugir d'atacas aerianas.

La batalha de la Mar dei Filipinas es una batalha navala e aeriana de la Segonda Guèrra Mondiala que se debanèt dau 19 au 20 de junh de 1944 en parallèl dei batalhas de Saipan e de Tinian. L'objectiu dei Japonés èra d'atraire e d'anientar una partida de la flòta estatsunidenca a l'entorn de l'archipèla dei Marianas. Pasmens, leis Estatsunidencs avián descriptat certaneis elements de l'estrategia de l'armada imperiala e reperats sei naviris. En particular, leis esquadrilhas basadas sus l'archipèla, que tenián un ròtle primordiau dins lo plan japonés, foguèron durament tocadas per de bombardaments aerians. De mai, en causa dei pèrdas subidas dins lo corrent deis annadas precedentas, lei pilòts japonés mancavan d'experiéncia. La batalha foguèt ansin un desastre per Japon que perdiguèt 3 pòrta-avions e 395 avions. Son aeronautica foguèt plus una menaça vertadiera fins a la fin de la guèrra. La flòta estatsunidenca perdiguèt solament 123 avions.