Batalha de Yamen
|
Batalha de Yamen
| |
|---|---|
| Informacions generalas | |
| Data | 18-19 de març de 1279 |
| Luòc | Baia de Yamen |
| Eissida | Victòria Yuan |
| Belligerants | |
| Empèri Song | Empèri Yuan |
| Comandants | |
| Zhang Shijie | Zhang Hongfan |
| Fòrças en preséncia | |
| 1 000 naviris 200 000 òmes |
420 naviris 20 000 òmes |
| Pèrdas | |
| Au mens 100 000 mòrts | Desconegudas |
La batalha de Yamen es una batalha navala que se debanèt dau 18 au 19 de març de 1279 entre una flòta Song (1 000 naviris e 200 000 òmes[1]) e una flòta mongòla (420 naviris e 20 000 òmes). S'acabèt per una victòria totala dei Mongòls qu'anientèron la fòrça enemiga entraïnant lo suicidi de la cort imperiala Song. Aquò marquèt la fin de l'Empèri Song e l'acabament de la conquista mongòla de China.
La situacion de la flòta Song, comandada per Zhang Shijie, èra marrida avans lo començament de la batalha. D'efiech, s'aviá una superioritat numerica clara, lei Song èran a pèrdre la guèrra còntra lei Mongòls qu'avián conquistat Guangzhou, la darriera vila chinesa importanta encara tenguda per lei Song. De mai, en 1278-1279, lei Mongòls avián destruch leis armadas terrèstras Song encara en estat de combatre e ocupat la màger part de China. Ansin, en abriu de 1276, l'emperatritz doairiera aviá acceptat de se sometre a Kubilai Khan, fondator de la dinastia mongòla Yuan, e l'emperaire Song Gong aviá abdicat. Pasmens, lei darriers partisans dei Song proclamèron emperaire un prince de la dinastia, Song Bing, e se retirèron dins lo sud. De son caire, lei Mongòls formèron una flòta a partir de marins chinés raliats e ne'n fisèron lo comandament au generau Zhang Hongfan.
En fàcia de sa situacion malaisada, Zhang Shijie ordonèt de blocar lei naviris Song entre elei amb de cadenas dins la baia de Yamen, quauquei quilomètres au sud-oèst de Guangzhou. L'idèa èra d'empachar lei desercions e la fugida dei vaissèus avans lo combat. Pasmens, Zhang Hongfan detectèt aquela feblessa e ataquèt sensa esperar. Intrèron ansin dins la baia e assaièron de cremar seis adversaris mai lei naviris Song èran estats protegits per de pinturas empachant ò limitant leis incendis (a basa de fanja). Pasmens, la flòta mongòla capitèt de blocar la sortida de la baia. Incapables de desbarcar per trobar de viures e d'aiga en causa de la preséncia d'armadas mongòlas, d'equipatges assaièron de beure d'aiga salada. Finalament, lo 19, la flòta mongòla ataquèt e destruguèt son adversari afeblit. Durant la catastròfa, Zhang Shijie assaièt de s'enfugir amb quauquei naviris per sauvar l'emperaire mai foguèt blocat. La màger part deis oficiaus Song se suicidiguèron per defugir la captura.
Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) Patricia Buckley Ebrey, Anne Walthall e James B. Palais, East Asia: A Cultural, Social, and Political History, Boston, Houghton Mifflin, 2006.
- (en) Morris Rossabi, Khubilai Khan : His Life and Times, Berkeley, University of California Press, 1988.
Nòtas e referéncias
[modificar | Modificar lo còdi]- ↑ Pasmens, aquel efectiu dona lo nombre de civius e de militars presents dins la flòta. Lo nombre de combatents capables de se batre èra probablament pus pròche de 10 000.