Batalha de Hattin
La batalha de Hattin se debanèt lo 4 de julhet de 1187 entre l'armada de Saladin e aquela dau Reiaume de Jerusalèm, sostengut per divèrseis aliats, qu'èra comandanda per Gui de Lusinhan. Lei fòrças dau camp musulman son mau conegudas e estimadas entre 20 000 e 40 000 òmes e entre 18 000 e 20 000 òmes per lei Crosats.
Lo combat foguèt entraïnat per l'aumentacion dei tensions entre Jerusalèm e Saladin dempuei la mòrt dau rèi Baudoïn IV (1174-1185). Maugrat de divisions intèrnas importantas, lo rèi Gui de Lusinhan capitèt d'unificar lei fòrças deis estats crosats per atacar Saladin qu'esperèt son adversari au sud-oèst dau Lac de Tiberiàs. Avans lo combat, preparèt la region en empoisonant lei fònts ò en incendiant la vegetacion. Ansin, lei Crosats aguèron de dificultats per s'avitalhar. Alassats, organizèron una posicion defensiva onte foguèron atacats per lei tropas de Saladin. I opausèron una viva resisténcia mai foguèron finalament obligadas de capitular franc d'un còrs de cavalariá dirigit per Ramon III de Tripòls que poguèt rompre l'enceuclament per s'escapar.
La batalha s'acabèt per una victòria majora de Saladin. D'efiech, en despiech de pèrdas importantas fòrça importantas dins son armada, anientèt la màger part dei fòrças militaras dau Reiaume de Jerusalèm e poguèt ne'n començar la conquista sistematica. En particular, poguèt prendre Beirot (6 d'aost), Ascalon (4 de setembre), Gaza (5 de setembre) e Jerusalèm (2 d'octòbre). Pasmens, lo pòrt de Tir li resistiguèt permetent l'arribada de la Tresena Crosada.