Batalha de Cold Harbor
La batalha de Cold Harbor se debanèt dau 31 de mai au 12 de junh de 1864 durant la Guèrra de Secession (1861-1865). Opausèt una armada unionista de 108 000 òmes comandats per lo generau Ulysses S. Grant a l'armada confederada dau generau Robert E. Lee (58 000 òmes). S'acabèt per una victòria defensa sudista.
Aqueu combat es la seguida dei batalha de la Wilderness (5-7 de mai) e Spotsylvania (9-21 de mai) e de la volontat de Grant de contornejar lei posicions de Lee per l'èst. Pasmens, de retards dins la preparacion de l'ataca permetèron ai Sudistas de preparar una defensa complèxa basada sus un ret de trencadas fortificadas que prefigurava lei linhas construchas durant la Premiera Guèrra Mondiala. Après quauqueis escaramochas, l'ofensiva principala de Grant aguèt luòc lo 3 de junh e s'acabèt per una revirada saunosa. Durament tocats, lei soudats nordistas cavèron tanben de trencadas, çò qu'entraïnèt l'encalament de la batalha. Lo 12, Grant decidèt de se retirar per perseguir sa temptativa de contornejament.
La batalha es considerada coma un important succès defensiu sudista car Lee perdiguèt solament 5 300 òmes còntra 12 700 per son adversari. Dins aquò, dins lei fachs, son succès empediguèt pas Grant de perseguir son movement vèrs lo sud, çò que menèt au sètge de Petersburg.