Apèu (drech)
L’apèu es, en drech, una via que permet de contestar ò d'annular lo jutjament d'un tribunau. Sa definicion e sa mesa en òbra varian segon leis Estats. Pasmens, l'apèu es generalament dubèrt a totei lei partidas implicadas dins un procès e consistís a sasir una juridiccion identica ò superiora a aquela qu'a emés lo jutjament contestat per tornar jutjar un afaire en drech e en fach.
Lo drech d'apèu es un eiretatge deis Estats primitius onte lo poder èra generalament concentrat entre lei mans d'un individú unic (emperaire, faraon, califa, rèi, prince...). Per permetre lo foncionament de la justícia, son poder juridic èra donc sovent delegat a de jutges locaus encargats de gerir leis afaires de la vida vidanta. Dins aquò, cada justiciable aviá lo drech de demandar dirèctament un jutjament dau sobeiran, çò que menèt a la mesa en plaça de juridiccions superioras ai juridiccions localas. Aqueu sistèma s'es mantengut amb l'aparicion deis Estats modèrnes onte lo drech es generalament dich coma una cort de justícia suprèma (Cort de cassacion francesa, Cort Suprèma estatsunidenca...).