Alexander Graham Bell

Un article de Wikipèdia, l'enciclopèdia liura.
Alexander Graham Bell
Profession: scientific e inventor
País: Escòcia
Data de naissença: 3 de març de 1847
Luòc de naissença: Edimborg, Escòcia
Data de decès: 2 d'agost de 1922
Luòc de decès: Beinn Bhreagh, Canadà

Alexander Graham Bell (n. en 1847, m. en 1922) foguèt un scientific e inventor escocés. Es considerat l'inventor del telefòn a mai aquesta atribucion siá discutida.

Biografia[modificar | Modificar lo còdi]

Alexander Graham Bell, fisician e inventor, nasquèt lo 3 de març de 1847 a Edimborg (Escòcia) e estudièt a las Universitats d'Edimborg e de Londres. Emigrèt a Canadà en 1870. Arribèt puèi als Estats Units en 1872.[1]

Als Estats Units comencèt per donar de corses als sords-muts en divulgar lo sistèma nomenat lengatge visible. Aqueste sistèma èra estat desvolopat per son paire, l'educador escocés Alexander Melville Bell. En 1872, A.G.Bell fondèt una escòla per sords-muts a Boston (Massachusetts), que s'integrèt puèi dins l'Universitat de Boston ont Bell venguèt professor de Fisiologia Vocala.[1] En 1882 obtenguèt la nacionalitat nòrd-americana.

Bell que parla per telefòn, 1876 (actor, 1926)

Tre sos 18 ans, Bell trabalhava l'idèa de la transmission de la paraula. En 1874, mentre que trabalhava sus un telegraf multiple, desvolopèt las idèas basicas de çò que vendriá lo telefòn. Sas experiéncias amb son ajudaire Thomas Watson capitèron son foncionar lo 10 de març de 1876.[1]

Una demostracion aquel meteis an pendent l'Exposicion del Centenari a Filadelfia (Pennsilvània), lancèt son invencion dins tot lo mond e lo menèt a metre en pès en 1877 La Companhiá de Telefòns Bell. En 1880, França li concediguèt lo prèmi Volta, amb una recompensa de 50 000 francs, per son invencion.

Bastiguèt d'autras invencions coma: lo fotofòn, l'audiomètre e la balança d'induccion e pausèt las basas del gramofòn modèrne.

Foguèt a mai un dels cofondaires de la National Geographic que ne foguèt president entre 1896 e 1904. Tanben fondèt la revista Science.

Se moriguèt lo 2 d'agost de 1922 a Cape Breton Island (Canadà) ont estivava. Lo govèrn canadian sèrva un musèu que encabís fòrça de sas invencions originalas.

Nòtas[modificar | Modificar lo còdi]

  1. 1,0 1,1 et 1,2 Alexander Graham Bell Laboratory Notebook, 1875-1876