Abisoye Ajayi-Akinfolarin
Abisoye Ajayi-Akinfolarin (nascuda Abisoye Abosede Ajayi, lo 19 de mai de 1985) es una activista nigeriana dels dreches de la femna. Es la fondatritz de Pearls Africa Youth Foundation, una organizacion pas governamentala que son objectiu es d'educar las joves dins los airals isolats de Nigèria amb l'ajuda de tecnologia.
Primièras annadas e educacion[modificar | Modificar lo còdi]
Abisoye nasquèt a Akure, la capitala de l'estat d'Ondo, en Nigèria. Estudièt a l'Institut Nigerian d'Informacion Tecnologica (NIIT) e mai tard a l'Universitat de Lagos, qu'i obtenguèt un diplòma en administracion d'entrepresas.
Carrièra professionala[modificar | Modificar lo còdi]
Ajayi-Akinfolarin comencèt la carrièra professionala en trabalhant per E. D. P Audit and Security Associates pendent sèt ans, en començant coma estagiària fins al nivèl de consultora associada. En trabalhant dins la tecnologia, Ajayi-Akinfolarin descobriguèt la discriminacion de genre. Una enquèsta estatala realizada en Nigèria en 2013, mostrèt que mens de 8% de las plaças professionalas de gestion o tecnologicas son en mans de femnas nigerianas. Per ajudar a redusir aquela discriminacion e encoratjar mai de femnas, Ajayi-Akinfolarin creèt una organizacion sens tòca lucrativa.
En 2012, creèt Pearls Africa Youth Foundation, una organizacion non governamentala qu'ajuda las gojatas a desvolopar de competéncias tecnologicas a travèrs divèrses programas coma GirlsCoding, G.C Mentors, GirlsInSTEM e Empowered Hands. Dempuèi 2012 l'organizacion a format mai de 400 jovas dins aquel domeni.