Wikipèdia:AcuèlhLutzSus/25 de genièr
Josèp Romanilha (Sant Romieg, 8 d’avost de 1818 - 24 de mai de 1891) foguèt un escrivan provençau, professor de Frederic Mistral e fondador amb eu dau Felibritge. Foguèt tanben lo segond capolier d’aquela organizacion.
Naissut dins una familha paura de jardiniers e ainat de sèt enfants, recebèt una educacion classica au collègi de Tarascon per èsser mai tard curat. Chausiguèt pasmens un autre camin e prenguèt una plaça de mèstre d'estudis (susvelhant) dins un pensionat privat de Niom ont trabalhèt lo provençau amb de collègas trobaires. Frederic Mistral foguèt un de seis escolans (quand lo pensionat s'installèt a Avinhon) e Romanilha foguèt un dei premiers a descubrir e encoratjar sei talents literaris en provençau.
Tre sa fondacion, foguèt una personalitat centrala dau Felibritge ont impausèt sa vision sus l’ortografia; conservator e catolic afogat, foguèt un important rivau de Teodòr Aubanèu. Grand contaire, faguèt mai qu’inspirar Anfós Daudet que son òbra es pauc mai qu’una traduccion au francés dei còntes de Romanilha (incompleta puèi que, per exemple, en mai dau curat, lo legeire provençau coneis lo mètge de Cucunhan).