Roald Dahl

Un article de Wikipèdia, l'enciclopèdia liura.
Anar a : navigacion, Recercar

Roald Dahl (Llandaff, País de Galas, 13 de setembre de 1916-Oxford, Anglatèrra,23 de novembre de 1990) foguèt un escrivan britanic d'origina norvegiana. Escriguèt mantun libre adreçat tant al jovent qu'als adultes que se caracterizan sovent per son umor negre. Demest sas òbras mai famosas figuran Charlie and the Chocolate Factory, Matilda o James and the Giant Peach.

Biografia[modificar | modificar la font]

Roald Dahl nasquèt en 1916 a Villa Marie, Fairwater Road a Llandaff, actualament un barri de Cardiff, la capitala del País de Galas, dins una familha modèsta de norvegians emigrats. Los parents de Roald, Harald Dahl que veniá de Sarpsborg e s'èra installat a Cardiff dins los ans 1880 e Sofie Magdalene Dahl (nascuda Hesselberg) s'èran maridat en 1911. Dahl recebèt son pichòt nom en omenatge a l'explorador polar Roald Amundsen, qu'èra un eròi nacional en Norvègia en aquel temps. Roald parlava norvegian a l'ostal amb sos parents e mai amb sas sòrres Astri, Alfhild, e Else. Roald e sas sòrres foguèron batejats a la glèisa norvegiana de Cardiff, luòc de culte de sos parents.

En 1920, quand Dahl aviá pas que tres ans, sa sòrre Astri que n'aviá sèt moriguèt aprèp aver agut una apendiciti. Qualques setmanas mai tard, foguèt son paire que moriguèt, d'una pneumonia a l'edat de 57 ans durant una sortida de pesca dins l'Antartic. Sa maire, confrontada a la possibilitat de tornar en Norvègia viure amb de membres de sa familha, decidiguèt finalament de demorar al País de Galas que son marit Harald desirava que sos enfants recebèssen son educacion dins d'escòlas britanicas, qu'èran a son vejaire las melhoras del mond.

Dahl estudièt primièr a la Cathedral School de Llandaff e puèi foguèt mandat a un internat a Weston-super-Mare en Anglatèrra. Aquela èra l'escòla anglesa mai pròcha que s'i podiá accedir gràcias al ferry que circulava regularament. Son temps a l'escòla Saint Peter foguèt una experiéncia dificila pel jove Roald que s'i languissiá fòrça de l'ostal e per encausa de la censura escolara ne podiá pas parlar dins las letras qu'enviava cada setmana a sa maire. S'assabentèt en 1967 aprèp la mòrt de sa maire, qu'aquela aviá servat caduna de sas letras, amolonadas en paquetons ligats per un ligam verd, Dahl evoquèt son experiéncia a Saint Peter dins son autobiografia: Boy: Tales of Childhood.