Rino Della Negra
Rino Della Negra (18 d'aost de 1923, Vimy - 21 de febrier de 1944, fòrt dau Mont Valérien) es un jogaire de fotbòl italian e un resistent francés que faguèt partida dau Grop Manouchian.
Nascut dins una familha d'imigrants italians antifaissistas, venguèt obrier de l'usina Chausson d'Asnières-sur-Seine en 1937. En parallèl, comencèt una carriera de jogaire de fotbòl a Argenteuil e foguèt seleccionat dins la seleccion regionala de París. Puei, en 1942, signèt au Red Star. Pasmens, coma lo govèrn de Vichèi voliá suprimir lo professionalisme, joguèt ges de rescòntre oficiau per lo club parisenc.
La meteissa annada, Della Negre refusèt d'anar en Alemanha dins lo quadre dau Servici dau Trabalh Obligatòri. En plaça, s'engatjèt dins lei Francs Tiraires e Partisans. I jonhèt lo grop comandat per Missak Manouchian (1906-1944). Fins a novembre de 1943, participèt ansin a plusors accions armadas còntra l'armada alemanda, compres a l'assassinat dau generau von Apt lo 7 de junh. Foguèt finalament arrestat dins una temptativa mancada d'ataca còntra d'acompanhaires de fons alemands lo 13 de novembre. Condamnat a mòrt, foguèt fusilhat lo 21 de febrier de 1944 amb lo grop Manouchian.
Rino Della Negra recebèt la Medalha de la Resisténcia a títol postum e una ceremònia organiza cada an a Argenteuil continua de celebrar sa memòria lo 21 de febrier. La tribuna oèst de l'Estadi Bauer, l'estadi dau Red Star, pòrta tanben son nom.
Liames intèrnes[modificar | Modificar lo còdi]
Bibliografia[modificar | Modificar lo còdi]
- Dimitri Manessis e Jean Vigreux, Rino Della Negra. Footballeur et partisan, Libertalia 2022.