Patricia Kaas

Patricia Kaas, nascuda lo 5 de decembre de 1966 a Forbach en Mosèla, es una cantaira francesa. Revelada tre la fin de l'annada de 1987 ambe la cançon Mademoiselle chante le blues, foguèt l'una de las cantairas las mai importantas de la scèna francesa entre 1988 e 1994.^[1]

Biografia[modificar | Modificar lo còdi]

De paire francés, sa maire es alemanda e sa lenga mairala es lo dialecte dich platt mosellan.

Comença de balhar de concèrts tre sos uèch ans, en fasent represas de las cançons en francés de Claude François o de Mireille Mathieu, mas canta tanben cançons en anglés coma New York, New York o Just a Gigolo.

En 1979, es engatjada dins un cabaret de Saarbrücken, lo « Rumpelkammer Club », ont canta cada dissabte de ser pendent sèt ans. Es fin finala remarcada en 1984 per François Bernheim, que se desplaça a Francfòrt per l'escotar cantar a una fèsta de la cervesa. Tornat a París, François Bernheim demanda a Élisabeth Depardieu de coproduire lo primièr disc de Patricia Kaas amb el, Gérard Depardieu participant financièrament a n'aquel primièr enregistrament. Aital lo títol Jalouse pareis en 1985, mas a pas brica de resson. Dos ans mai tard François Bernheim presenta alavetz Patricia Kaas a Didier Barbelivien, que li prepausa d'enregistrar sa composicion Mademoiselle chante le blues. Sortida en 45 torns, la cançon entra al Top 50 en França en novembre de 1987 e puja fins a la setena plaça en genièr de 1988. Ambe aquel títol, Patricia Kaas es recompensada pel prèmi Charles Cros. Lo 5 de decembre, lo jorn de sos 21 ans, monta pel primièr còp sus l'empont de l'Olimpia a París, en primièra partida de Julie Pietri.

En novembre de 1988 pareis lo primièr album de Patricia Kaas, Mademoiselle chante.... Obten un grand succès en França e dins los païses francofòns gràcias als tubes D'Allemagne, Mon mec à moi, Elle voulait jouer cabaret e Quand Jimmy dit. En seguida, obten lo prètz de la « Revelacion de l'annada » a las Victòrias de la musica en França.

Sos dos albums seguents, Scène de vie (1990) e Je te dis vous (1993), an tanben un grand resson, ambe de títols coma Les Hommes qui passent, Entrer dans la lumière e sustot Il me dit que je suis belle (escrich per Jean-Jacques Goldman).