Jausèp Allain

Un article de Wikipèdia, l'enciclopèdia liura.

Jausèp Allain, neishut a Sent Andrieu de Cuzat (Gironda) en 1891, mòrt en 1959, èra un poèta e vinhairon occitan.

Proprietari de vinhas, vinhairon de mestèir, Jausep Allain aucupèt a St Andrieu, a la debuta dau sègle XXau, lo ròle de poèta municipau. Sas òbras son majoritàriament en occitan dau Cubsagués, e son pas shens rapelar l’estil de Pau Froment. Se reclamèt sustot de Mistral, d’Aubanèu e de Jansemin. Deishèt egau quauques tèxtes en francés, de fòrt mens bona qualitat.

Pròche dau Felibritge, que citèt dens sas òbras (En sovenir d’una felibrada, La Hèsta mancada…), n’escriu totun pas en grafia felibrenca, e n’avem pas nada pròva de son passatge dens l’institucion mistralenca. Son sol ligame atestat damb lo monde felibrenc es la redaccion de poèmas de circonstància per las felibrejadas girondinas de las annadas 30, notadament la de Sent Andrieu de Cuzat en 1931.

Damb sos collègas poètas occitans dau Cubsagués Leon Vuelha (Léon Veuille), d'Aubia e Espessàs, e Andriu Gojars, que hut a la basa de l'informala academia gascona dau Cubsagués, una mena de cèrcle de qui s'amassava regulariament ende soscar a la melhoracion de la lenga, sa promocion e son abeliment. Agissent lavetz coma un cèrcle felibrenc, sembla pas egau n'ager estat oficialament un.

Las suas òbras, manescriutas, son encara anueit ineditas, levat quauques poèmas publicats dens lo jornau Le Cubzaguais dens las annadas 30.