Guèrra de las Malvinas

Un article de Wikipèdia, l'enciclopèdia liura.
Anar a : navigacion, Recercar


La Guèrra de las Malvinas (var.Guèrra dei/deras Malvinas) o Guèrra de l'Atlantic Sud qu'oposè lo regim de la Dictatura Militara Argentina dab lo govèrn anglés de la Purmèra Ministra Margaret Thatcher entau contròlle de la soberanitat suber l'achipèl de las Islas Malvinas.

A maugrat de la realitat anciana d'aqueth conflicte, ambs gobèrns qu'èran en dificultas dens sengles país e qu'enssagèn de virar se las dab ua guèrra. Los dus govèrns que credèvan que las causas e serèn aisidas entà eths : Anglatèrra qu'avèva ua evidenta superioritat militara mentre que lo govèrn d'ideologia capitalista de la Dictatura qu'èra politicament pròche deus regims anglosaxons d'Anglatèrra e deus Estats Units d'America e, en mei d'aquò, que credèva qu'Anglatèrra qu'èra chic interessada per aquesta colonia pauc defenuda, isolada e costosa. Au cap de l'expulsion de l'armada argentina per las òst britanicas la Dictatura Militara Argentina que cadó e lo Partit Conservator que gavidè Anglatèrra per mantuas annadas après, a maugrat de las soas coentas iniciaus e d'ua tradicion anteriora de govèrns tribalhistas.

Lo pretèxte de la guèrra que ho la revindicacion Argentina de crubar las islas Malvinas d'on las soa populacion e la soa autoritat èran estadas expulsadas per ua invasion anglesa en 1833. A maugrat d'aquesta invasion e de las revindicacions Argentinas, las relacions enter ambs país que demorèn bona e quitament estretas e privilegiadas dinc a la fin de la Segonda Guèrra Mondiau au mens.

Aqueth statu quo que ho rot dab l'expulsion per l'armada anglesa e devath los òrdis de la Purmèra Ministra d'ua enterpresa argentina qui èra estada contractada entà efectuar tribalhs dens las islas Georgia deu Sud per'mor d'aver hissada ua banèra argentina. Ua escalada militara que seguí dant atau a ambs govèrns lo parat de mobilizar las loas opinion publicas e de desbrembar atau las loas mauescadudas respectivas politicas, sociaus e economicas.

A maugrat de çò de previst per la Junta Militara argentina, lo govèrn deus Estats Units d'America, lo lor aligat e sostien dens las loa Guèrra Lèda contre l'esquèrra, que l'abandonè au prohèit d'Anglatèrra, país de medisha origina culturau. L'ajuda americana qu'obliguè l'armada de l'aire argentina e volar hèra baish ; França, aligada dab Anglatèrra, que ho implicada estrategicament e ambigüosamet dens lo conflicte per'mor l'armament argentin qu'èra estat crompat a França. Argentina que ho sostienguda per tots los país americans (a l'excepcion deus Estats Units, de Colómbia, de Trinitat e Tobago e sustot de Chile qui, gavidat peu regim capitalista deu dictator Augusto Pinochet, e èra un enemic d'Argentina e un aligat ideologic d'Anglatèrra e deus Estats Units d'America) ; a maugrat d'estar governada per ua junta de dreta anticomunista, Argentina que ho tanben sostienuda per país comunistas com l'Union Sovietica (cinicament un enemic ideologic mes un partenari economic deus màgers) e per Cuba (solidari d'aqueth país latino american vadut tot d'un còp ostil de cap au monde anglosaxon).

Au cap de las operacions militaras - on participè lo princi Andrew de York - las òst britanicas que tornèn controllar las Malvinas. Lo conflicte que tuè 649 argentins, 255 sordats britanics e 3 kelpers (nom deus colons britanics de las Malvinas).