Coexisténcia Pacifica
La Coexisténcia Pacifica es un periòde de la Guèrra Freja que durèt de 1956 a 1962. Iniciada per Nikita Khrushchov après sa presa dau poder en URSS, aviá per objectiu d'abandonar la corsa ais armaments e lei perspectivas d'un conflicte militar entre lei dos blòts au profiech d'una confrontacion pus pacifica dins lei domenis ideologics, scientifics, culturaus e economics. Sa mesa en òbra suscitèt una certana maufisança mai foguèt finalament favorizada per l'obtencion de l'arma nucleara per leis Union Sovietica e per leis Estats Units que podián plus intrar en conflicte dirècte. Lei doas superpoissanças reconoguèron sei zònas d'influéncia respectivas e limitèron leis ambicions de seis aliats respectius coma, per exemple, durant la crisi de Suèz. Dins aquò, la confrontacion contunièt dins mai d'una region (empèris coloniaus, guerilhas comunistas sud-americanas, etc.).
La Coexisténcia Pacifica permetèt de demenir lei tensions entre lei dos blòts mai sei limits apareguèron en 1962 amb la crisi dei missils de Cuba. Ansin, après lo reglament d'aquela crisi, l'Oèst e l'Èst decidèron de s'engatjar dins la Destenduda que foguèt un periòde marcat per una demenicion importanta de la rivalitat americanosovietica.
Per extension, lo tèrme es de còps utilizat per designar d'autrei periòdes istorics similars marcats per una temptativa de reduccion dei tensions entre dos blòts ò dos empèris rivaus.