Thomson (pistolet mitralhaire)
Lo Thomson es un pistolet mitralhaire estatsunidenc desvolopat a la fin deis ans 1910 per John T. Thompson. N'existís plusors variantas que foguèron utilizadas fins a la Guèrra de Corèa. Èran d'armas relativament pesucas (mai de 4,7 kg sensa lo cargaire) destinadas a tirar la municion poderosa de .45 ACP. La cadéncia de tirs se situava entre 600 e 800 còps/mn e la portada eficaça èra de 50 m. Dispausavan de selectors de tir permetent de chausir lei mòdes semiautomatic o automatic.
Amb son cargaire tambor de 100 cartochas, l'arma venguèt famosa durant la Prohibition en causa de son utilizacion per lei movements criminaus estatsunidencs. En 1941, durant la Segonda Guèrra Mondiala, una version simplificada foguèt concebuda per equipar lei tropas estatsunidencas e aliadas. Maugrat una portada eficaça pus febla que son adversari alemand dirèct (lo MP40 capable de tuar a 100 m), demorèt una arma presada en causa de la poissança dau .45 ACP. Foguèt tanben utilizada en Corèa entre 1950 e 1953. Pasmens, après aquela data, sei limits tròp importants entraïnèron son abandon dins la màger part deis armadas modèrnas. Demorèt utilizada per de movements de guerilha fins ais ans 1970.