SpaceX

Un article de Wikipèdia, l'enciclopèdia liura.
Sauter à la navigation Sauter à la recherche
Dintrada del sèti de SpaceX a Hawthorne (Califòrnia)

Space Exploration Technologies Corporation, coneguda jol nom de SpaceX, es una societat americana (USA) de transpòrt aerospacial.

Es estada creada en 2002 per Elon Musk amb per tòca de far mermar lo còst desplaçaments entre la Tèrra e l'espaci. Las fusadas emplegadas an per nom Falcon. Es un dels dos prestataris privats que la NASA fisèt un contracte de transpòrt de fret cap a l'Estacion Espaciala Internacionala (ISS) dins l'encastre del programa COTS.

La societat SpaceX concèp, construtz e comercializa los lançaires Falcon 9, los motors Merlin que las propulsan e lo vaissèl cargo Dragon e sa version abitada. Lo lançaire Falcon 1 que foguèt lo primièr lançaire de la societat es pas pus en servici. Après tres fracasses en 2006, 2007 e 2008, aguèt luòc lo 28 de setembre de 2008 lo primièr succès del lançaire Falcon 1, que metèt puèi en orbita lo satellit d'observacion malaisian RazakSAT durant son cinqen vòl, lo 13 de juilhèt de 2009. Lo cargo espacial Dragon lançat per una fusada Falcon 9 òbra dins l'encastre del programa d'avitalhament de l'Estacion espaciala internacionala. SpaceX, qu'emplega mai de 4 000 personas (2015) mai que mai en Califòrnia, dispausa en mai de doas installacions de lançament sus la basa de Cap Canaveral (los pads SLC-40 e 39A), un a Vandenberg Air Force Base (lo pad SLC-4E) e un autre es a se bastir dins lo sud de Tèxas, a Boca Chica. SpaceX dispausa tanben d'un banc d'ensages per sos motors en Texàs.

Lo 6 de febrièr de 2018 la fusada Falcon Heavy es lançada amb succès e plaça en orbita eliocentrica la Rooadster Tesla d' Elon Musk.