Sant Andrieu de Salardú
Sant Andrieu de Salardú ei ua glèisa romanica de transicion deth sègle XII e XIII, situada ena part nauta, sus ua terrassa tancada per un mur, deth municipi de Naut Aran ena Val d'Aran. Aubèrgue eth Crist de Salardú, ua des òbres mès representatives der romanic aranés.
Eth portal laterau, daubèrt ath mur de mièidia, a cinc arquivòutes trebalhades que son pausades sus colomnes e capitèls. Sus eth quite mur ei ondrat de dues arcades. Eth campanar ei octogonau e i siguèren ajustadi dos nivèus (sègle XV). Forma un còs a despart der angle sud-oèst, ei fòrça esvèlt e ei cargat de sagetères que li donen un caractèr defensiu. Era capçalera ei formada per tres absis semicirculars ondrats tamb permodòls e coronada per un campanar de cadireta.
En interior, era planta ei basilical, rectangulara, tamb tres naus. Era centrau ei cubèrta per ua vòuta apuntada sostenguda per pilars e es lateraus, per vòutes de quarts de cercle reforçades tamb arcs toraus.
Eth famós Crist de Salardú, escultura romanica deth sègle XII, presideish er autar major, tamb pintures au fresc que siguèren restaurades recentament. Ei ua òbra deth meteish autor que eth Crist de Mijaran.