Rashi

Un article de Wikipèdia, l'enciclopèdia liura.
Anar a : navigacion, Recercar
Rashi
Beit Midrash de Rashi a Worms.

Rashi, ‏רש"י‎, es l'acronim ebrieu de Rabbi Shelomò Yitzhaqi (ebrieu: רבי שלמה יצחקי), (Tròias c. 1040 - 29 de Tammuz de 4865 (= dijòus 20 de julhet de 1105), comentator dei tèxtes sagrats josieus tant de la Torà escricha (doncas: Pentateuc, Profètas, Agiografs) coma de la Torà orala (Talmud).

Sa vida[modificar | modificar la font]

Se sap pauc quant a la biografia de Rashi, e leis elements segurs e averats d'un ponch de vista istoric son escasses. Rashi podriá èsser descendent d'un linhatge rabinic illustre que remontariá fins au rei Dàvid.

En fach, podriá èsser descendent per sa maire dau Rav Elyakim, eu-meteis descendent dins la 31ena generacion de Rabbi Yohanan lo sandalier, un Tanna citat sovent dins lo Talmud, eu-meteis rèire-rèire-felen de Gamaliel (fiu de Rabbi Shimon, fiu de Hillel Hazaken), reputat de linhatge davidic.

Son paire moriguèt en "sant" (doncas, en refusant d'abjurar sa fe). Rashi o cita mai d'un còp coma "mon mèstre", e podriá aver estudiat quauqueis ans amb eu.

Lo premier comentari de Rashi sus lo Pentateuc se dobrís sus leis mots de Amar Rabbi Yitzhak (rabin Isaac a dich). Maugrat aquò, se tracta pas d'un ensenhament dau paire de Rashi mas d'un midrash venent dau recuelh Tanhuma Yashan.

Son oncle maternau, Rav Shimon l'Ancian, estudièt longtemps près de Rabbeinuu Guershom de Maiança, subrenomenat meor Hagola (lutz de l'exili).

Mainatge, Rashi se destrièt segurament per sa memòria prodigiosa, e passèt per un mèstre complit amb vint ans. Part per estudiar dins leis escòlas talmudicas renanas près dau Rav Yaakov ben R'Yakar ("mon vièlh mèstre") a Maiança e de contunh, a la mòrt d'aqueu, près dau Rav Yts'hak ben Eleazar Haleví a Worms.