Poténcies der Èish

Pels articles omonims, vejatz ais (omonimia).

Adolf Hitler.

Benito Mussolini.

Hideki Tōjō.

Era expression Poténcias de l'Ais (var. Poténcias de l'Èish, Poténcias de l'Ais, reg. Poténcies der Èish) designe es Estats avent combatut contra es Aliats pendent era Segonda Guèrra Mondiala.

Eth tèrme es estat tornat popular per Benito Mussolini que, pendent un discors tengut a Milan eth 1^èr de novembre de 1936, a definit er acòrdi estipulat eth 24 d'octobre precedent entre Alemanha e eth Reialme d'Itàlia coma un "ais", e per aquera rason aperat er «Ais de Roma-Berlin». Eth pacte d'acièr ulterior, estipulat per es dues poténcies eth 22 de mai de 1939, representave eth primièr nuclèu der aliança militara, espandida mai tard a Japon damb eth pacte tripartit deth 27 de setembre de 1940 (egalament conegut damb eth nom d'«Ais Roma-Berlin-Tòquio»).

Puèi, d'autres Estats an egalament rejonch era coalicion en rejonhent eth Pacte tripartit. Er Ais, format abans tot per es nacions insatisfachas der òrdre geopolitic creat ar endeman dera Primièra Guèrra Mondiala, èra cimentat per es afinitats ideologicas des regims autoritaris que'us governavan, e aviá per mira de constituïr un «Òrdre novèl» que veiriá era supremacia d'Alemanha en Euròpa continentala, d'Itàlia en Mediterranèa e de Japon en Extrèm-Orient. Politicament, aviá per mira de contrar eth capitalisme des democracies occidentales (Reialme Unit, França e Estats Units) e eth bolchevisme der Union Sovietica.

Nòtas e referéncias[modificar | modificar la font]

Wikidata: Q43056
Multimedia: Axis powers