Palais deis papas d'Avinhon
Lo Palais deis papas d'Avinhon, apelat simplament lo palais deis papas ò lo palais d'Avinhon (palays d’Avinhon en occitan ancian[1]), es la pus granda dei construccions gotica de l' Edat Mejana. A l'encòp fortalesa e palais, la residéncia pontificala foguèt pendent lo sègle xiv lo sèti de la crestiantat d'Occident. Lo palais dei papas es situat au nòrd d'Avinhon, foguèt bastit subre un puèg rocassós, lo ròc dei Dòms, que susplomba la riba senestra de Ròse. Set papas e dos antipapas s'i succediguèron. Lei premiers demorèron a Avinhon de 1309 a 1376. Lei segonds s'i instalèron de 1378 a 1413. Sièis conclaus se son tenguts dins lo palais d'Avinhon que menèron a l'eleccion de Beneset XII, en 1335 ; de Clamenç VI, en 1342 ; d'Inocenci VI, en 1352 ; d'Urban V, en 1362 ; de Gregòri XI, en 1370, et de Beneset XIII, en 1394.