Paire nadal
Lo Paire Nadal es un personatge ligat a la fèsta de Nadal. La tradicion del paire Nadal es relativament recenta. Es Sant Nicolàs, protector dels enfants, qu’a inspirat aqueste personatge. Sa representacion actuala data de 1931. Se retròba dins l’imatge del Paire Nadal tot çò que fasiá la simbolica del personatge de Sant Nicolàs, la longa barba blanca, la mitra qu’es venguda una boneta de forradura, lo grand mantèl roge. Viatja dins una lisa, tirada per de rèns, Sant Nicolàs viatjava sus l’esquina d’un ase. La veneracion d’aqueste sant es estada importada als Estats Units al sègle XVII per los immigrats alemands e olandeses. Mai tard, i auriá pres una amplor comerciala e subit de transformacions vestimentàrias e culturalas per se transformar en Paire Nadal mai convivial abans de tornar en Euròpa. Per los americans, l’olandés Sinter Klaas (Sant Nicolàs), a donat Santa Claus. Es en 1931 que lo paire Nadal prenguèt fin finala un novèl anament dins un imatge publicitari, difusat per la companhia Coca Cola.
Gràcias al talent artistic del dessenhaire Hadden Sundblem, lo personatge prenguèt d’ara endavant una estatura umana (lo rendent aital mai convencent e plan mai accessible), un ventre rebombissent, una cara simpatica, un aire galòi, una actitud bonifàcia. La longa rauba roja es estada remplaçada per de braias e una camisa longa. Aquò es mai marcat als Estats Units, que, en França, lo Paire Nadal a conservat una longa rauba roja.
Lo gigant american dels sodàs desirava aital butar los consomators a bèure de Coca Cola en plen ivèrn. Pendent quasi 35 ans, Coca Cola difusèt lo retrach del Paire Nadal pertot dins lo mond. L’idèa que los enfants se fan uèi del personatge e fortament impregnada d’aqueste imatge principalament publicitari.
Nòtas
[modificar | Modificar lo còdi]Mercé a las recèrcas de Joan Salles Loustau, dins son lexic nadalenc.