PACS
Lo PACS, Pacte Civil de Solidaritat, (Pacte civil de solidarité en francés) es, en França, una fòrma d'union civila.
Es un contracte de drech francés. La lei qu'instaura lo PACS foguèt votada en 1999 jol governament de Lionel Jospin. Lo PACS es un contracte entre doas personas majoras, quin que siá lor sèxe, a per objectiu l'organizacion de lor vida comuna.
Aquel tèxte nais d'una volontat de fondar juridicament l'existéncia dels cobles non maridats, quitament de meteis sèxe. Atal, contràriament al maridatge, lo PACS es dobèrt als parelhs de meteis sèxe. Ofrís un quadre juridic complèt, contràriament al concubinatge (qu'es una simpla union de fach desprovesida de tot estatut), e amb mai de soplesa que lo matrimòni, qu'es una institucion fòrça plan reglamentada qu'a per objectiu la fondacion d'una familha.
Mai de 200 000 PACS foguèron signats durant las sièis primièras annadas. La primièra lei sul PACS, assolada sus l'indivision dels bens, foguèt modificada per la lei del 23 de junh de 2006, que prevei ara, levat una convencion contrària, un regime dels bens comparable a aquel dels esposes. De mai, lo regime fiscal del PACS sembla ara lo del maridatge.
Bravament melhorat, lo regime juridic del PACS caup encara fòrça flaquesas e mancas, particularament sus las ajudas socialas, lo decès del partenari, los cobles internationals, sens parlar dels partenaris pacsats abans lo 1èr de genièr de 2007, que demòran someses al regime de la lei anciana.
