Nadia Sàvchenko
Nadia Víktorivna Sàvchenko (en ucraïnian: Надія Вікторівна Савченко, en transcripcion internacionala Nadiya Savchenko; Kyiv, 11 de mai de 1981) es una politiciana, anciana oficièra de l'armada e ex-presonièra politica ucraïniana. Foguèt una de las primièras femnas a venir pilòta d'aviacion. Es actualament la sola aviatritz ucraïniana del bombardièr Sokhòi Su-24 e de l'elicoptèr Mil Mi-24.
Venguèt famosa internacionalament en junh de 2014 quand foguèt capturada per las fòrças prorussas dins l'èst d'Ucraïna del temps que luchava amb lo Batalhon Aidar. Mai tard se vegèt transferida illegalament en Russia ont l'acusèron d'aver tuat dos jornalistas russes durant l'insurreccion de Donbàs.
Posteriorament se vegèt detenguda dins una clinica psiquiatrica russa abans d'èsser transferida en preson a Vorònezh. A la debuta del mes d'octobre de 2014 foguèt plaçada en primièra posicion sus la lista de Batkivschyna per las Eleccions al Parlament Ucraïnian del 26 d'octobre del meteis an e venguèt deputada al Parlament Ucraïnian lo jorn seguent.
Foguèt finalament liberada e rapatriada en Ucraïna lo 26 de mai de 2016 gràcias a un escambi amb dos oficièrs russes presonièrs (Yevgeny Yerofeyev e Alexander Alexandrov) capturats en 2015 pel Servici de Seguretat Ucraïnian.
Biografia
[modificar | Modificar lo còdi]
Nadia Sàvchenko nasquèt a Kyiv en 1981 dins una familha de classa mejana de la capitala. Son paire èra un engenhaire agricòla mentre que sa maire, Maria, trabalhava dins la concepcion de cargos. Amb sa sòrre Vira foguèron abalidas e educadas en ucraïnian. Ja que somiava dempuèi qu'èra pichona de pilotar un avion, quand faguèt 16 ans s'engatgèt dins l'armada ucraïniana e i trabalhèt coma operatritz de ràdio abans de s'entrainar per venir paracasudista.